Згазете и почувствувајте ги материјалите – нови содржини за посетителите во Градскиот парк

Градоначалникот на Скопје Петре Шилегов денеска се сретна со групата волонтери од Бон кои изминатиов период работеа на креирање ново катче и инсталација во првиот дел од Градскиот парк.
Новото катче во Градскиот парк се состои од кружна патека од различни материјали: парчиња од дрво, природни камења, тревник, калдрма, цементирани плочи и други материјали што ја подобруваат циркулацијата, односно ќе треба да го поттикнуваат движењето, да ги активираат сетилата, а со тоа да даваат и добар здравствен ефект кај децата. Идејата е децата да газат и да се движат боси, а до самата патека ќе биде поставено и шкафче за чевли. Во средината на катчето ќе биде поставен сончев часовник каде преку сенката на детето ќе може да се види колку е часот.
Шилегов, како што соопшти Град Скопје, им се заблагодари на Антје Калер и Никлас Рот, консултанти од Одделот за финансирање на градот Бон, кои работеа на овој проект. Нивната прва посета во Скопје беше минатата година со уште пет едукатори со кои заеднички размислуваа за изработка на креативен проект во градот. Во реализацијата на оваа интересна нова содржина вклучени беа седум тренери, стручни волонтери, вработени од областа на театарот, градинарството и хортикултурата од градот Бон, како и претставници од ЈП „Улици и патишта“ и „Паркови и зеленило“.
Град Скопје и Град Бон соработуваат од 2015 година преку проекти како „Ерасмус Плус“ и „Nice to work with you!“. Соработката се заснова на идејата како Град Скопје да се промовира во урбаниот туризам.
loading...