Земјоделците од Неготино добија државна отштета за мрзнењето на земјоделските култури во 2021

Исплатени се финансиски средства за земјоделци од Неготино, за претрпени штети од мрзнење на земјоделски култури, информираше синоќа неготинскиот градоначалник Горан Стојанов.

Тој соопшти дека врз основа на донесена одлука од Владата за надомест на штета од елементарни непогоди, на Општина Неготино ѝ е обезбедена парична помош од буџетот за 2023 година, во висина од 10 отсто од вкупно проценетата штета од 163 милиони денари, или 16 милиони. Мрзнењето се случи во 2021 година.

Стојанов појасни дека средствата биле трансферирани на посебна наменска сметка на 24 февруари. Во овој период биле обработени преку 650 налози и средствата вчера им биле исплатени на оние што претрпеле штети, согласно законскиот рок за исплата на овие финансиски средства, што е заклучно со 24 март.