Зеленски им се обрати на Украинците за да ги подготви за инвазија (ВИДЕО)

Претседателот на Украина, Володимир Зеленски во обраќањето пред Украинците на својот Фејсбук профил изјави дека среда може да биде денот на руската инвазија, а тој ден ќе го прогласи како ден на украинско национално единство, јави Ројтерс.

-Големи луѓе на голема земја! Пред нашата држава има сериозни надворешни и внатрешни предизвици, кои бараат одговорност, доверба и конкретни дејствија од мене и од секој од нас.
Ние сме заплашувани од голема војна и уште еднаш е одреден  датумот на воената инвазија. Ова не е прв пат. Но, нашата држава денес е посилна од кога било.

Ние се стремиме кон мир и сакаме сите прашања да ги решаваме исклучиво преку преговори. И Донбас, и Крим ќе се вратат во Украина. Само на дипломатски начин. Не гледаме  во туѓото, но нема да го дадеме своето. Имаме неверојатна армија. Нашите момчиња имаат уникатно борбено искуство и модерно оружје. Таа е повеќе пати посилна од армијата пред осум години. Ние сме уверени во нашите вооружени сили, а и нашата војска треба да ја почувствува нашата поддршка, нашето заедништво и нашето единство. Основата на нашата армија е довербата на сопствениот народ и силната економија.

Ни велат дека 16 февруари ќе биде денот на нападот. Ќе го направиме дена на обединување. Указот е веќе потпишан. Попладнево ќе закачиме национални знамиња, ќе облечеме сино-жолти ленти и ќе му го покажеме на светот нашето единство.

Имаме голема европска аспирација. Ние сакаме слобода и подготвени сме да гласаме за неа. Од небото не гледаат 14 илјади бранители и цивили кои загинаа во оваа војна. И ние нема да го изневериме нивното сеќавање.

Сите сакаме да живееме среќно, а среќата ги сака силните. Никогаш не сме можеле да се откажеме и нема да го научиме тоа. Сакајте ја Украина! Ние сме во мир! Ние сме силни! Ние сме заедно!= рече Зеленски.

Зеленски не кажа кој го предложил датумот на 16 февруари. Сепак, неколку американски новински организации минатата недела објавија дека Вашингтон верува дека тоа е датумот кога руските сили ќе бидат подготвени ако Путин даде наредба за инвазија.

Зеленски ги повика државните претставници, политичарите и бизнисмените кои неодамна ја напуштија државата да се вратат во Украина во рок од 24 часа и да покажат единство со нацијата поради стравувањата од руска инвазија.

„Ваша директна должност е во таква ситуација да бидете со нас, со украинскиот народ. Ви предлагам да се вратите во својата татковина во рок од 24 часа и да застанете рамо до рамо со украинската армија, нашата дипломатија и нашиот народ“, рече Зеленски во видео обраќање.

Украинските медиуми објавија дека некои пратеници и водечки бизнисмени ја напуштиле земјата минатиот викенд, откако САД, Велика Британија и други западни земји ги советувале своите граѓани итно да ја напуштат Украина.

„Вратете се кај вашиот народ и вашата земја, која беше извор на вашите фабрики и богатство“, нагласи Зеленски.

Генералниот секретар на ОН Антонио Гутереш одвоено разговараше со рускиот министер за надворешни работи Сергеј Лавров и со украинскиот министер за надворешни работи Дмитриј Кулеба, изјави портпаролот на ОН Стефан Дижарик. Тој вели дека постои голема загриженост. 

Францускиот министер за надворешни работи Жан-Ив Ле Дриан предупреди  дека „сите елементи“ се во прилог на тоа дека Русија може да изврши „голема офанзива“ против Украина, откако Москва распореди илјадници војници на нејзините граници.