Зелен хуман град со 31 буџетски предлог за зелено и хумано Скопје

Вкупно 31 проект за одржлив и праведен развој на градот, симболично на 13 Ноември, Денот на ослободувањето на Скопје, поднесоа  од иницијативата ЗЕЛЕН ХУМАН ГРАД на одржаниот Граѓански буџетски форум.

Новина е што оваа година за разлика од претходниот Граѓански буџетски форум, вклучени беа и три најгласани предлози од платформата за директна демократија МојГрад. Вкупниот износ потребен за реализација на сите поднесени предлози од четиринаесет активистички групи е некаде околу една милијарда денари, што претставува една седмина од целосниот буџет на Град Скопје.

На самиот форум своите предлози ги образложија Ана Петровска, НаТочак, Хумани градови, ЕдуАктив Орг, Е.Д.Е.Н., Ајде Македонија, Мама Органа, Биди Зелен, Меѓаши, Мој Воздух, Културно Ехо, Ромалитико, Полио плус. Се предлагаше инвестирање во фотоволтаична централа; субвенции за фотоволтаични системи; обезбедување енергетска ефикасност на објектите под надлежност на Градот; довршување на Зелениот катастар и конципирање Стратегија за развој на зеленилото во Скопје што ќе послужат како основа за заштита на зеленилото при изработката на претстојниот Генерален урбанистички план на Скопје; локална хипермрежа од мерни станици за аерозагадување; противпожарна станица во Шуто Оризари; воспоставување општински биокомпостари; градска народна кујна; оптимизирање на велоинфраструктурата; изработка на стратешки документ Визија нула; редовен ден без автомобили; примарна селекција на пластика и хартија во домаќинствата; работилница за рециклирање на отпадна пластика; пасивни училишта; стратегии за лица со попреченост и за унапредување на правата на децата; студија за пренамена на напуштениот индустриски комплекс „Купрум“ во студентски град; урбани градини во училишта; субвенции за стерилизација/кастрација на (вдомени) бездомни животни; трансформација на скопската Зоолошка во центар за рехабилитација и конзервација на диви автохтони видови животни; заменување на коњите со еко-превозни средства; куќарки за бездомни животни. Дискусијата ја модерираше проф. Бранимир Јовановиќ кој имаше и свој осврт на предлозите, а на почетокот на форумот свое излагање за справување со енергетската сиромаштија и обезбедување енергетска независност во Македонија имаше проф. Стефан Бужаровски од Универзитетот во Манчестер – европски експерт за енергетска сиромаштија.

Голем дел од предлозите беа доставени и на минатогодишниот Граѓански буџетски форум, но минатото раководство немаше никаков слух за нивна реализација иако доминантно се работи за зелени инвестиции со кои не само што ќе се влијае на намалување на сиромаштијата, туку  ќе се обезбеди повисок квалитет на живот во целина. Очекуваме целосна соработка и конструктивност од новата градоначалничка на Град Скопје, како и од новото мнозинство. Скопјани мора да бидат делотворно вклучени во процесот на одредување на приоритетите кои ќе бидат финансирани од нашите заеднички пари.

Во понеделник, 15 ноември, советниците од ЗЕЛЕН ХУМАН ГРАД, Драгана Велковска и Горјан Јовановски, ќе ги поднесат предлозите за зелено и хумано Скопје и официјално во писмена форма преку архивата на Град Скопје.