Захариева го означи Пендаровски како „агент“ на Србија и Русија

Откако ги напаѓаше по ред многуте македонски политичари Екатерина захариева сега го стави на нишанот и Стево Пендаровски. Поранешната бугарска министерка за надворешни работи оцени дека македонскиот претседател не ги штител интересите на својата татковина, туку ѝ служел на политиката на Србија и Русија на Балканот. Според неа, Пендаровски со своите изјави го кочи развојот на односите меѓу Софија и Скопје.

„Бугарија мора да има многу дефинитивна и остра реакција на изјавата на претседателот на Македонија, Стево Пендаровски. За жал, ова не е првпат да дава остри изјави кои не помагаат во развојот на билатералните односи“, рече Захариева во интервју за Бгнес.

Захариева, која е претседателка на собраниската Комисија за надворешни работи, се согласува дека треба да се смират односите меѓу двете земји, но затоа пред сѐ морало да се потрудат официјалните власти во Скопје.

Таа се надева дека македонската влада нема да ги послуша сугестиите на Пендаровски да им се забрани влезот на Ангел Џамбаски и неколкумина други Бугари. „Силно се надевам дека македонската влада нема да го почитува неговото барање, бидејќи тоа многу повеќе ќе ги ескалира билатералните односи. Ова ќе им служи на оние бугарски политичари кои не сакаат да бидат пуштени на територијата на РСМ. Некои од нив исто така не помагаат за нормализирање на односите“, рече таа.

Захариева го поканила бугарскиот амбасадор во Скопје, Ангел Ангелов, денеска на сослушување во Комисијата за надворешна политика. „Многу е важно од него да се слушне од прва рака, кој е начинот за нормализирање на односите, каква треба да биде бугарската реакција, да се слушне и ставот на народните избраници и шефот на дипломатијата“, рече Захариева.