(Видео) Отворен автопатот Миладиновци – Штип: Покрај него ќе се засадат 600.000 багреми

На денешното официјално отворање на автопатот Миладиновци – Штип, премиерот Зоран Заев најави дека покрај патот ќе се засадат 600.000 багреми.

Премиерот Зоран Заев пред министрите Оливер Спасовски, Горан Сугарески, Трајан Димковски, пратеници од Собранието и амбасадорката на НР Кина го отвори свечено автопатот Штип – Миладиновци, кој веќе еден месец е во употреба, но без претходна церемонија поради набиената владина агенда.

„Граѓаните добија модерно автопатско поврзување и побрзо стигнување до посакуваните дестинации во источниот де од Македонија. Се скратува времето на возење до 25 минути помеѓу многу градови од овој регион“, рече Заев.

Тој пресмета дека ако претходно луѓето патувале еден час, сега патуваат за помалку од 30 минути по максимално безбеден пат.

„Оваа нова врска е исклучително важна за рамномерниот регионален економски раст што е важен предуслов за инвеститорите и мултиплицирање на нивниот капитал. Започнувањето на изградбата на автопатот Скопје – Блаце и завршувањето на автопатот Кичево – Охрид ќе биде голем поттик за инвеститорите“, смета премиерот.

Истакна дека, поврзувањето со соседите ќе биде висок приоритет.

„Овој автопат останува во трајна сопственост на граѓаните на Северна Македонија и на компаниите. Ги тргнавме сите пропусти и благодарност до „Синохидро“, „Бетон“ и „Гранит“, кои работеа неуморно. Сега започнува пошумувањето на 600.000 садници со багрем и инвестирање во животната средина на косините на овој автопат“, потенцира Заев.

Директорот на ЈП за државни патишта Зоран Китанов во обраќањето на денешнто свечено пуштање во употреба на новиот автопат истакна дека на ваков начин се поврзува централниот дел на државата со источниот, а оти преку изградбата на новите експресни патишта Штип-Кочани и Штип-Радовиш побрзо ќе се поврзат градовите Струмица, Радовиш, Кочани, Берово, Делчево и другите градови од источниот и југоисточниот дел на РСМ.

-Вкупната должина на автопатската делница изенсува 47 километри со два коловози, со ширина на коловозот од 10,7 метри, со две возни ленти и лента за застанување со разделен појас од четири метри меѓу двата коловози. Вкупната дебелина на асфалтниот слој изнесува 19 сантиметри. Овој автопат има седум клучки кај Миалдинвоци, Средно Коњаре, Преот, Свети Николе-север, Свети Николе-југоисток, Кадрифаково и Три чешми. На автопатот има пет големи вијадукти, еден голем мост на река Пчиња, уште неколку помали моста, 13 натпатници, 35 потпатници и повеќе од 146 плочести цевасти пропусти, рече Китанов.

Градежните активности на автопатот Штип – Миладиновци се одвивале вкупно 4 години и 8 месеци, од мај 2014 до декември 2018 година, при што најголем интензитет на градење се случувал во периодот од 2017 до 2018 година. На оваа автопатска делница првично имала вредност од 226,7 милиони евра, но направена е заштеда од 44 милиони евра со што овој автопат е реализиран со вкупно 177,3 милиони евра.

Министерот за транспорт и врски Горан Сугарески истакна дека автопатот Миладиновци-Свети Николе-Штип е крупен капитален проект кој ќе придонесе за економски раст на државата, а особено ќе го зајакне источниот регион како дел од Паневропскиот Коридор 8.

-Новиот автопат е од особена важност за регионалното поврзување со соседните земји како дополнителен импут за нашите евроитнегративни процеси, рече Сугарески.

Тој забележа дека визијата на оваа Влада е да се инвестира во модерна патна инфраструктура, а во  источниот регион се инвестирани перку 100 милиони евра во изградба на нови експресни патишта и реконструкција на регионалните магистрални патишта. Тој најави дека во следниот период ќе се подигне безбедноста на патиштата на едно повисоко ниво.

Вицепремиерот Анѓушев истакна дека кога дошол на функцијата најголем предизвик му било да се забрза изградбата и да се отстранат сите препреки за квалитетна изградба на автопатот.

-Кога го гледам резултатот не можам да ја сокријам среќата дека успеавме да изградиме квалитетен автопат по светски стандарди кој овозможува безбеден и брз транспорт. Особено ми е важна безбедноста на нашите граѓани, рече Анѓушев.

На денешното свечено пуштање се обрати и амбасадорката на Република Кина Лисјен која најави дека одобрен е евтин кредит и за изградба на автопатот Кичево-Охрид. Се заблагодари на сите вработени во кинеската компанија „Синохидро“ и на македонските компании кои учествува во изградбата на автопатската делница Штип-Свети Николе-Миладиновци.

-Изградбата на инфраструктурата е основа за зголемување на поврзувањето, развој на економијата и за зголемување на животниот стандард. Автопатот Штип-Миладиновци ќе ги подобри сообраќајните услуги во земјава и ќе допринесе за развој на трговијата и туризмот во населените места покрај автопатот, рече Лисјен.

Во автопатската делница, долга 47 километри се вложени 177 милиони евра, и по неа се вози од пред еден месец, со соодветна сигнализација.