За влез во Словенија повеќе не важат ПЦР тестовите од Северна Македонија и регионот

Според одлуката на словенечката влада, од денеска веќе не е можно да се влезе во таа земја со направен негативен ПЦР тест во институции во земји кои не се членки на ЕУ, односно на шенген зоната, соопштено е на веб-страницата на Амбасадата на Словенија во Белград.

За влез во Словенија веќе не важат ПЦР тестовите од Србија, Северна Македонија, Босна и Херцеговина, Црна Гора и Косово.

Како што е наведено, почнувајќи од 25 декември, влез во Словенија без одење во карантин можен е само со негативен ПЦР тест од ЕУ, односно од шенген зоната, не постар од 24 часа.

Со одлуката се предвидува дека влез во Словенија од земјите на црвената листа, без упатување дома во карантин или без приложување негативен ПЦР тест е дозволен само за седум исклучоци.

Тоа се лицата кои се вработени во една од земјите-членки на ЕУ или друга земја од шенген зоната, за што имаат доказ, односно потпишана изјава со која се докажува причината за преминување на границата како дневен работник-мигрант и се враќаат во рок од 14 часа по преминувањето на границата, оние кои вршат меѓународен транспорт, како и лица кои превезуваат стока во Словенија или од Словенија во комерцијален сообраќај или во товарен сообраќај во транзит и ја напуштаат Словенија во рок од осум часа по преминувањето на границата.

Исто така, иземени се лица што патуваат транзитно низ Словенија и ја напуштаат не подоцна од шест часа по влегувањето, претставници на странски безбедносни органи, кои извршуваат службена задача и ја напуштаат Словенија што е можно поскоро по извршување на задачата, лица кои се донесени во Словенија со брза помош и медицинската придружба во тоа возило, како и лица со дипломатски пасош.