Вучиќ призна енергетски колапс во Србија, ја обвини српската Електропривреда
Српскиот претседател Александар Вучиќ го призна енергетскиот колапс во земјата во последните денови во услови на обилен снег.
– Според последните информации, 0,38 отсто од потрошувачите во Србија се без напојување со електрична енергија. Процентот е добар, имајќи ги предвид временските услови, рече претседателот на седницата на Владата на Србија.
– Се случи комплетниот систем да испадне затоа што Електропривреда на Србија (ЕПС) не водела сметка колку може да биде влажен јагленот и колку кал може да ги оштети сите шест блокови во ТЕНТ. Затоа Обреновац извесно време немаше парно бидејќи е директно приклучен на ТЕНТ. Затоа увезовме енормни количества струја. За среќа, успеавме брзо и за среќа, нашиот преносен систем издржа се. Реакцијата беше брза, но финансиската штета за Србија е секако огромна. Треба да знаете дека кога ќе се исклучи термоцентралата во Нови Сад, треба да увеземе 1,8 милиони кубни метри гас, објасни Вучиќ и додаде дека во понеделник се очекува целосна стабилизација.
Вучиќ рече дека во вторникот во Костолац бил затворен еден блок, но тоа нема врска со грешка или со снег.
Тој додаде дека земјата има големи проблеми со снабдувањето со гас.
– Имаме цена од 270 долари за количините што ги вети претседателот на Русија Владимир Путин според потрошувачката од минатата година, но можеме да набавиме само поголеми количини на гас, а кога ги има, можеме да ги набавиме само на залиха, размена. Сега кога ни се потребни дополнителни количини гас, можеме да го купиме само на берза по највисоки можни цени. Тоа е катастрофа за нас, како и набавката на струја, рече Вучиќ и додаде дека за среќа земјата има стабилни финансии за да може да го реши проблемот што се појави.
Повеќе од 90.000 потрошувачи во Србија во понеделникот останаа без струја. Речиси 1,5 GW од тековната потрошувачка покрива со увоз, што е невиден случај, по испадот на двете најголеми електрани на јаглен – ТЕНТ А и ТЕНТ Б.
Првиот обилен снег оваа сезона го парализираше сообраќајот во Србија и предизвика дефекти во системите за централно греење, производство и дистрибуција на електрична енергија, па дури и водоснабдување.
Во еден момент запре најголемата електрана на јаглен во Србија, Никола Тесла А (ТЕНТ А), објавија на социјалните мрежи вработените во државната електроенергетска индустрија на Србија (ЕПС). (СЕЕбиз.еу)