Во Прилеп промовирана книгата „Маалски прикаски“ на Синиша Станковиќ

Во прилепската градска библиотека „Борка Талески“ денеска е промовирана книгата „Маалски прикаски“(1+2) од новинарот и писател Синиша Станковиќ. Книгата која првата промоција ја имаше во јуни во МКЦ во Скопје е издание на издавачката куќа „Или-Или“, содржи 65 приказни за луѓето, настаниете, состојбите во едно скоопско маало, толку слично со маалата во другите градови.

Според авторот Станковиќ, не може да се избегне носталгијата за еден начин на живот, но содржи и паралели со начинот на животот на младите генерации.

-Без намера да нудам некакви решенија, ниту да тврдам дека тоа време било најдобро, или подобро од денешново, туку, едноставно, се навратив, со спомени и сеќавања, за едно, за мене, убаво време. Направив паралела со времето во кое расте син ми, со она во кое јас растев, со огромните разлики на правилата, или на непостоењето правила денес. Желбата ми е нешто што со години е правено, вака вкоричено, да биде подостапно до читателите низ Македонија. Особено што повеќе градови и немаат книжарници, рече Станковиќ.

Според него, не може да се побегне од секојдневието кое ни стана политика, но и од егзистенцијалните маки, притисоците.

-Колку и да сакам да пишувам убава литература, јас сум и новинар, па не може да се избегне. И начинот на кој се пишувани, јас ги нарекував „Белешки на случајниот минувач“. Како новинар избегнувам да давам пораки, пред сѐ, зашто не сум убеден дека тие пораки стигнуваат некаде. А како писател го пишувам она кое сакам да остане забележано. А ако тоа допре до некого, би бил среќен, рече Станковиќ.

Има намера да објави книгата посветена на 30-те години „македонска пролет“, односно за „Млад борец, 1989-2019“

-Книгата е „спакувана“. Се обидувам да најдам начин да ја објавам книгата посветена на 30-те години „македонска пролет“. Ако не успеам до крајот на оваа година, ќе оставиме за 40-годишнината, вели Станковиќ.

Книгата „Маалски прикаски“ досега, освен во Скопје, е промовирана и во Кавадарци, Струмица и во Битола, потоа ќе се промовира во Куманово и во уште три града.