Во Прилеп е отежнато водоснабдувањето

Поради сушниот период, енормната потрошувачка на вода за пиење и драстичното намалување на дарежливоста на изворот Студенчица, во Прилеп е отежнато водоснабдувањето.

Прилепското јавнопретпријатие „Водовод и канализација“ има полни раце работа во прераспределба на водата што ја има и се вклучени бунарите и изворите за секое домаќинство да има вода за пиење и за основните потреби.

Според Емил Јанески, директор на ЈКП „Водовод и канализација“ екипите постојано се на терен за нормализирање на водоснабдувањето.

– Последниве неколку дена се соочивме со недостиг од вода за пиење. Енормно е намалена дарежливоста на изворот Студенчица која во моментов е под 600 литри вода во секунда од кои за Прилеп пристигнуваат околу 130 литри вода во секунда. Вклучени се и бунарите од кои градот добива дополнителни 60-ина, а од изворите околу 20 литри вода во секунда. Но поради жештините потрошувачката е енормна и достигнува околу 400 литри вода во секунда. Ја подигнавме мобилноста на претпријатието на највисоко ниво. Последните денови, вклучувајќи го и викендот постојано бевме на терен. Вршевме пренасочување на водата за да стигне до сите граѓани во секој дел од градот, ги штелуваме регулаторите за притисок, навечер собираме вода во коморите, ја ставивме во употреба бунарската постројка „Кишовица-Орушица“, а во овој момент ја приклучуваме бунарската постројка „Бегова ливада“, а се подготвуваме да ја ставиме во функција и бунарската постројка „Кошарка“. И наредните денови, екипите на ЈКП „Водовод и канализација“ постојано ќе бидат на теренот за до секое домаќинство да доставиме доволно количества вода, објаснува Јанески.

Прилепски водовод упатува апел до граѓаните рационално да ја трошат водата за пиење во овие моменти кога е намалена дарежливоста на Студенчица. Да се избегнуваат наводнувањата, миењето на дворовите и рационално да се користи. Не се планираат редукции.

– Навечер, кога е намалена потрошувачката, собираме вода во коморите која ја користиме преку денот за напојување на „Ниската зона“, а количествата вода што доаѓаат од Студенчица, преку денот се пренасочуваат во „Високата зона“. Во овој момент нема да има редукција и нема делови од градот кои се без вода. непредвидливи се количествата вода од Студенчица. Доколку се задржат високите температури и ако понатаму опаѓа дарежливоста на Студенчица, тогаш ќе се соочуваме со проблеми, но не очекувам редукции. Ќе има вода за секое домаќинство и ако се троши рационално имаме можности да ги задоволиме потребите на граѓаните. Главно, со постојано присуство на теренот и пренасочување на количествата вода, вели Јанески.

Како што објаснува Јанески, водоснабдувањето може да се нарече стабилно со сите зафати на претпријатието, а неопходно е и прифаќањето на апелот за рационално трошење на водата. Ако разумно се троши водата, ако не се краде и не се користи за наводнување, за Прилеп ќе бидат доволни околу 250 литри вода во секунда за да се задоволат основните потреби. Инаку, водата е целосно исправна за пиење.