Во петок ќе се решава судбината на Белата палата

Наскоро ќе биде познато дали ВМРО-ДПМНЕ ќе остане без ,,Белата палата”, поточно без луксузното партиско седиште, пишува  „Фокус“.

Овој објект беше конфискуван по првостепената пресуда за случајот ,,Талир 2″, а сега Апелација треба да пресуди дали партијата дефинитивно ќе остане со празни раце. Поточно, во петок, на 7 јули, во Апелација е закажана јавната седница за случајот ,,Талир 2″, на СЈО,  а со кој беше замрзнато  партиското седиште.

Првостепената пресудата беше донесена пред една година, а со неа на затворска казна од 6 години беше осуден екс премиерот Никола Груевски, а поранешниот генерален секретар, Кирил Божиновски, доби условна казна од две години.Доколку второстепениот суд ја потврди пресудата на Кривичниот суд, тоа ќе значи и извршување на конфискацијата на објектот, но неизвесно е во чии раце ќе заврши потоа.  Во нормална ситуација би припаднал на државата, но  случајот се комплицира бидејќи објектот е под банкарска хипотека за кредит од три милиони евра што го земала партијата.

Со случајот ,,Талир 2 ” се откри начинот на кој ВМРО-ДПМНЕ дошла до имот вреден 8,2 милиони евра, во кои спаѓаат Белата палата и уште два милиони евра кои градежната компанија „Бетон“, во сопственост на бизнисменот Минчо Јорданов, ги исплатила на партијата додека го градела објектот. Обвинителството тврди дека „Бетон“ не смеела да влезе во партнерство со партијата за изградба на објектот, бидејќи во 2011 и 2012 година, кога почна да се гради седиштето, компанијата дури 75 отсто од приходите ги остварила од државни тендери, што значи дека според законот не смеела да биде донатор на политичка партија.