Во малото село во Индија, од каде се претците на Камала Харис, се молат за нејзина победа

Храмот одекнуваше со ритмички санскритски и тамилски химни, додека хинду свештеникот држеше пламен пред богот. Додека ова мало јужноиндиско село се собра да се помоли за Камала Харис, група новинари се трудеа да бараат простор и агли на камерата.

Малку може да се разликува селото Туласендрапурам од која било друга рурална заедница во Тамил Наду, освен неговата поврзаност со жена која би можела да стане првиот американски лидер со јужноазиски корени.

Додека милиони Американци гласаат, Харис има луѓе кои навиваат за неа од илјадници километри подалеку во село опкружено со оризови полиња и кокосови дрвја, каде што семејството на нејзината мајка има предци. За неа зборуваат во локалната чајџилница. Банери и билборди со нејзиниот лик се гледаат низ целата заедница.

„Нашето божество е многу моќен Бог. Ако му се молиме добро, тој ќе ја направи победничка“, рече М. Натараџан, свештеник во храмот кој ги предводеше молитвите пред ликот на хиндуистичкото божество Ајанара, облик на богот Шива.

Дедото на Харис по мајка е роден во селото, на околу 350 километри од јужниот крајбрежен град Ченаи, пред повеќе од 100 години. Како возрасен, тој се преселил во Ченаи, каде што работел како висок владин функционер до неговото пензионирање.

Харис никогаш не го посетила Туласендрапурам и нема живи роднини во селото, но луѓето овде сè уште го почитуваат семејството што стана важно во САД.

„Правнуката на нашите селски предци се кандидира како претседателски кандидат на САД. Нејзината победа ќе биде среќна вест за секој од нас“, рече Натараџан.

Ненадејната слава на селото помогна да се донесат пари во него. Неодамна започна изградбата на резервоар за складирање вода со средства донирани од локална банка. Жителите на селото велат дека ќе носи плоча со името на Харис.

Покојната мајка на Харис, Шјамала Гопалан, е родена во Индија. Откако се преселила во САД да студира, таа се омажила за маж од Јамајка, а нивната ќерка ја нарекле Камала, санскритски збор за „цвет од лотос“.

Освен патувањата за време на нејзиното детство, Харис не ја посетувала Индија многу – особено не откако стана потпретседател – но честопати емотивно зборувала за нејзините врски со земјата на раѓање на нејзината покојна мајка. Во вторникот, таа објави видео од кампањата во кое ја истакнува нејзината мајка, која пристигна во САД на 19-годишна возраст и станала истражувач за рак.

Со наслов „Мајка“, видеото завршува со наратор кој вели: „Оваа ќерка на Шјамала, оваа ќерка на американската приказна, е подготвена да нѐ води напред“.

Харис често зборуваше за тоа како била водена од вредностите на нејзиниот дедо и мајка родени во Индија. Таа, исто така, зборуваше за нејзината љубов кон јужноиндиската храна, особено еден вид торта од ориз на пареа наречена идли.

Името на Харис е врежано во списокот на донатори – нејзината тетка Сарала Гопалан дала пари за храмот во нејзино име – заедно со она на нејзиниот дедо. Надвор, голем транспарент и посакува успех на „ќерката на земјата“ на изборите.

Во вторникот, селскиот храм прими и ретки меѓународни посетители: двајца американски туристи и еден од Обединетото Кралство, сите облечени во црни маици на кои пишуваше „Kamala Freakin Harris“.

Маникандан Ганесан, селанец кој води мала продавница во близина на храмот, рече дека кандидатурата на Харис за претседател го направи селото познато. Тој се надева дека Харис на крајот ќе ги посети.

„Дури и да спомне дека ќе го посети нашето село, тоа ќе нѐ израдува многу“, рече Ганесан. Самата нејзина победа ќе биде голем извор на среќа за нас.

Локалниот политичар Арулможи Судакар рече дека Харис отелотворува значаен чекор кон зајакнување на жените во места како Туласендрапурам, каде што мнозинството жени продолжуваат да се соочуваат со дискриминација и родова нееднаквост.

„Од времето кога на жените не им беше дозволено ниту да излезат од својата куќа, до сега една жена од нашето село која се натпреварува на претседателските избори во САД – ова носи среќа за нас“, рече Судакар. „Идните генерации ќе ја гледаат како пример за успех во животот“. (АП)