Во Камбоџа се изведоа рекордни 60 сијамски крокодили

Рекорден број сијамски крокодили се извеле во Камбоџа – вкупно 60, а тоа е особено значајно бидејќи се работи за загрозен вид.

Активистите за зачувување на природата го нарекуваат случајот „вистински знак на надеж“, кој доаѓа по повеќе од 20 години напори да се зголеми бројот на овие влекачи во оддалечените планини Кардамон. Маслинесто-зелениот слатководен рептил има карактеристичен коскен гребен на задниот дел од главата, а според проценките може да порасне и до три метри. Локалните жители откриле пет гнезда во мај, а младенчињата крокодили се извеле на крајот на јуни.

Сијамските крокодили некогаш биле широко распространети низ поголемиот дел од Југоисточна Азија, но долготрајниот лов и губењето на живеалиштата ги натера да се сметаат за „критично загрозен вид“. Има само околу 400 од нив во светот, а повеќето од нив се во Камбоџа.

Со оглед на нивната намалена популација во дивината, 60-те млади крокодили се огромен поттик и охрабрување за оние кои вложуваат напори да ги зачуваат. Претходно се стравуваше дека сијамските крокодили ќе исчезнат сѐ додека не беа повторно откриени во Камбоџа во 2000 година. Потоа беше започната програма за нивно одгледување во заробеништво, по што беа пуштени во соодветни живеалишта на планините Кардамон.

Во планините се вршат редовни патроли за да се чуваат крокодилите безбедни по ослободувањето. Од 2012 година, 196 крокодили се пуштени во дивината. Во мај оваа година, жителите открија гнезда во област каде крокодилите претходно не биле пуштени, што укажува на тоа дека видот се гнезди во своето природно живеалиште. Тимот задолжен за нивна заштита постојано ги надгледуваше гнездата додека не се изведат крокодилите.