Во јули ќе биде реконструирана скопската улица „Орце Николов“

Општина Центар најави дека во јули ќе започне со реконструкцијата на улицата „Орце Николов“, која е една од најфреквентите и најпознатите улици во Скопје, белег на Дебар Маало, со што почнува со средување на неследениот сообраќаен хаос.

– Водејќи се од мотото „Здравјето и безбедноста на граѓаните пред профитот“, за заштита на пешаците, а особено децата, со новиот проект, ќе се стесни коловозниот дел на улицата, со задржување на двете ленти за возила и ќе се изведе нов кружен тек. Почитувајќи ги урбанистичките стандарди и современ начин на живеење ќе се прошират тротоарите, со што ќе се ослободи повеќе простор за пешаците, велосипедистите и корисниците на другите видови алтернативен сообраќај, информира Општина Центар. Во соопштението се посочува дека на улицата „Орце Николов“, ќе се овозможи непречено движење на пешаците и велосипедистите, а новиот изглед и функционалност ќе го стимулираат користењето на велосипедот како алтернативен начин на сообраќај во насока на намалување на загадувањето. – За воведување на ред во хаосот со тротоари окупирани од возила, ќе се воспостави нов режим на сообраќај, со воведување на таканаречено „каскадно паркирање“.

Градоначалниот Саша Богдановиќ и Општина Центар водат посебна грижа и за зеленилото и дрвата. Со реконструкцијата, постоечкиот дрворед по цела должина на улицата ќе биде задржан. Со проектот за реконструкција на улицата „Орце Николов“, уште еднаш се потврдуваат заложбите за ослободување на јавниот простор, стеснувајќи го делот за автомобилски сообраќај и ослободување на тротоарите од паркирани возила, особено во овој период, кога свеста за зачувување на животната средина и на јавните простори е на многу повисоко ниво, се додава во соопштението.