Во делови на Велика Британија издадено предупредување за опасност по живот поради бурата Ентони

Британските власти издадоа предупредување за опасност по живот од бурата Ентони, што е придружена со силен дожд и силен ветер и напредува над делови од Обединетото Кралство.

Во сила е портокалова тревога во југозападна Англија и Велс до 19 часот (18 часот по средноевропско време).

Во меѓувреме, денеска до 20 часот е издадено жолто предупредување за невообичаено ветровито време за јужните делови на Велика Британија.

Истото ниво на предупредување, но за невреме со грмотевици, ќе биде во сила до 22 часот во југоисточниот дел на Англија.

Жолто предупредување за дожд е во сила до 16 часот за југоисточна Шкотска.

Според метеоролозите ветерот ќе достигне брзина до 110 километри на час долж брегот.