VMRO-DPMNE: LSDM-ja të tregojë nëse Xhezair Shaqiri është angazhuar si këshilltar i Zaevit


Zëdhënësi i VMRO-DPMNE-së, Naum Stoilkovski, sot në konferencë për shtyp kërkoi nga LSDM që të tregojë nëse Xhezair Shaqiri i njohur si “Komandant Hoxha” është punësuar si këshilltar i kryeministrit Zoran Zaev.

Ai tha se nëse fotografitë që janë shpërndarë në opinion janë të besueshme, atëherë qeveria nuk duhet të fsheh informacione të tilla, përcjell Telegrafi Maqedoni.

“Ajo që qeveria tanimë dy ditë nuk ka informacione është turp. Nëse nuk posedojnë informacione të thjeshta rreth atyre që punojnë në qeveri, atëherë çfarë informacione mund të plasojnë dhe sigurojnë nga Ministria e Transparencës e kësaj qeverie jopopullore. Nëse nuk do të ishte tragjike, do të ishte qesharake”, tha Stoilkovski.

Përndryshe, ditëve të fundit në disa media janë publikuar fotografi në të cilat “Komandant Hoxha” shihet në qeveri, ndërsa më pas u përfol se ai është punësuar si këshilltar i veçantë për siguri i kryeministrit Zoran Zaev.