И во затворени и во отворени објекти влез само со примени две дози вакцина или со потврда за прележан Ковид
Од денеска за влез во објектите потребен е сертификат со примени две дози вакцина или потврда за прележан Ковид-19 во последните 45 дена, сметајќи од денот на оздравувањето. Министерството за здравство апелира граѓаните да ги почитуваат мерките, да бидат одговорни и да се вакцинираат.
– Ги повикуваме граѓаните кои сѐ уште не се вакцинирани, што побрзо да го направат тоа. Само со колективен имунитет може да го победиме вирусот, соопштија вчера од Министерството за здравство, откако објавија за новите измени за влез во објекти.
Обврската ссе однесува како на објекти од затворен така и од отворен тип. Ваквата одлука беше донесена од страна на Владата на 26 октомври.
– Се дозволува влез во секаков вид на објекти од отворен и затворен тип, угостителските објекти (кафетерии, ресторани, барови, ноќни клубови-дискотеки), во угостителскиот објект/дел за исхрана во угостителските објекти за сместување (хотел, мотел, хостел, пансион и друг објект за сместување), на бензинските станици, во казината и обложувалниците, во други објекти кои во склоп на истиот даваат угостителски услуги, во угостителските објекти кои се регистрирани за прослави (веселби, свадби, родендени, крштевки и слично), како и се дозволува влез каде што се одржува настан од секаков друг вид (концерти, семинари, обуки, курсеви, состаноци, работилници, конференции, културни или спортски настани), на посетители / гости / лица, со поседување и приложување од 15 ноември на сертификат за примени две дози на вакцина против заразната болест КОВИД-19 или сертификат/потврда за прележан Ковид 19 во последните 45 дена, сметајќи од денот на оздравувањето, стои во одлуката на Владата.
Министерот за здравство Венко Филипче во петокот изјави дека засега нема да има препорака за нови рестриктивни мерки, бидејќи сегашните се сосема доволни, но дека треба да се почитуваат. Носењето маски, држењето дистанцата, честото миење раце и вакцинирањето, како што посочи Филипче, се основните принципи на кои се темелат сите мерки во борбата со пандемијата.
– Остануваме засега со истите мерки и апелираме сите да се придржуваат до нив. Доаѓаат семејни слави и апелирам граѓаните и оваа година како и претходните, ако можат да не ги организираат или да ги организираат во помал семеен круг. Сепак такви поголеми собири каде не се почитуваат мерките се ризик за епидемиолошката состојба да се влоши, рече Филипче.
Според вчерашните податоци, регистрирани се 285 нови случаи на Ковид-19 од направени 2.667 тестирања. Речиси половина од новите случаи се во Скопје – 110, по што следат Битола – 30, Прилеп – 24, Кочани – 20, Велес – 17, Куманово – 16, Тетово – 10, Кавадарци – 9, Гевгелија – 8, Неготино – 7, Ресен – 5, Штип, Охрид, Кичево и Свети Николе – по 4, Демир Хисар и Пехчево – по 3, Богданци – 2, Струмица, Делчево, Виница, Пробиштип и Кратово – по 1.
