Видеозаписи со поезијата на Конески во годината посветена на великанот на македонската култура

Во рамки на Националната програма „2021 – Година во чест на Блаже Конески“, Министерството за култура реализираше видео-материјал со поезијата на Блаже Конески на седум јазици: македонски, албански, босански, влашки, ромски, српски и турски јазик.

Националната програма е усвоена од Владата на Република Северна Македонија и е дел од календарот на важни меѓународни јубилеи на УНЕСКО.

Видеозаписите се достапни на веб-страната на Министерството за култура, на сите седум јазици.

-Како дел од програмата, и 100-годишнината од раѓањето на Блаже Конески, беа организирани мноштво настани. На 21 март, по повод Светскиот ден на поезијата, во седиштето на УНЕСКО во Париз се читаа песни од Конески. Песните ги читаа повеќе високи дипломатски претставници на УНЕСКО, на своите јазици, велат од Министерство за култура.

Беа распишани и конкурси за учениците од основните училишта, како и за млади автори за создавање дела инспирирани од поезијата на Блаже Конески. Преку јавен конкурс на Факултетот за ликовни уметности, при Универзитетот „Св. Кирил и Методиј“, од Министерството додаваат дека студентите преку илустрации оддале почит кон поетското наследство на Конески.

Народната банка на Северна Македонија издаде златна кована монета со ликот на Блаже Конески, а Поштата на Северна Македонија издаде поштенска марка со неговиот лик. Во јубилејната година, неколкупати се одржаа и настани во родното Небрегово на Конески, во спомен куќата каде што е роден. к.

Соработката за иницијатива на Националната програма за одбележување на капиталното научно и литературно дело на големиот Конески ја започнаа Министерството за култура и Министерството за образование и наука. На иницијативата се приклучи и Министерството за надворешни работи, а покровител на Програмата е претседателот на Република Северна Македонија, Стево Пендаровски.