Видеоснимка од дрон која го покажува размерот на катастрофата на црквата Нотр Дам

Франција се уште е во шок од пожарот што ја зафати катедралата Нотр Дам. Популарната катедрала гореше цели девет часа, а повеќе од 400 пожарникари се обидуваа цела вечер да го стават пожарот под контрола.

На интернет се појавија и снимки од дрон кои го покажуваат размерот на оваа катастрофа.

Речиси една милијарда долари се собрани од верници и моќни деловни магнати ширум светот за обновување на катедралата Нотр Дам во Париз, која е оштетена од катастрофалниот пожар што избувна пред два дена.

Градежни тимови утрово поставија голем кран и испорачаа дрвени плочи во близина на катедралата.

Францускиот претседател Емануел Макрон одреди петгодишен рок за обнова на катедралата од 12 век. Макрон денеска ќе претседава на вонредна владина седница посветена на несреќата во Нотр Дам.

Претседателскиот советник за заштита на културното наследство Стефан Берн денеска изјави дека досега се собрани 880 милиони евра. Меѓу оние кои донираа се и американскиот ИТ-гигант „Епл” и магнатите, кои ги поседуваат „Л’Oреал“, „Шанел“ и „Диор“, како и католици и припадници на други вери од Франција и од целиот свет.

Властите го сметаат пожарот за несреќен случај.