(Видео) Тенеси ќе ја погуби првата жена по 200 години

Во Тенеси се упатени бројни барања за одложување на погубувањето на Криста Пајк, кое е закажано за следната недела. Доколку казната се изврши, Пајк ќе стане првата жена погубена во оваа сојузна држава по повеќе од 200 години, пренесува UNILAD. Таа е осудена на смрт пред повеќе од три децении за убиството на Колин Слемер, извршено во 1995 година.

Заедно со двајца соучесници, таа ја намамила Слемер во шума во Ноксвил, каде што ја претепале, ја избоделе и ѝ врежале пентаграм на градите. Во моментот на злосторството таа имала 18 години, со што станала најмладата жена во историјата на САД осудена на смрт. Нејзините адвокати се обидуваат да го спречат погубувањето и поднеле барање за помилување до гувернерот Бил Ли. 

Во документот се детално опишани нејзините сериозни проблеми со менталното здравје, како и сексуалното насилство и злоставувањето што ги трпела уште од раното детство. Нејзините адвокати наведоа дека, како дете, таа „нацртала маж со огромен полов орган и демонско лице за да објасни што се случувало во нејзиниот дом“.

„Криста се соочила со речиси секој вид на животна несреќа и тешкотија.“
„Нејзините постапки на 18-годишна возраст не можат да се разгледуваат одвоено од детството одбележано со силување, сексуална злоупотреба и занемарување. Возрасните и државните институции, кои требало да ја заштитат, не реагирале на ниту еден од овие случаи“, се наведува во петицијата.

Нејзината адвокатка, Кели Глисон, изјави дека гувернерот сега има можност да ги исправи системските пропусти. „Гувернерот сега може да заштити жртва на силување во детството и да ги поправи грешките на возрасните, институциите и системите кои системски потфрлиле во однос на Криста додека таа била дете“, рече таа. Државата Тенеси не ја оспорува нејзината историја на сексуална злоупотреба. 

И други групи бараат помилување, вклучувајќи организации и поединци посветени на подигнување на свеста за негативните искуства во детството. „Криста се соочила со речиси секој вид несреќа што ние, кои работиме во оваа област, се стремиме да ја спречиме.“

„На грбот носи мрежа од лузни од претепувања“
„Нејзиното детство беше одбележано со хронично сексуално злоставување и силување, физичко и емоционално малтретирање, занемарување, зависност од дрога кај оние што се грижеле за неа, семејно насилство, сиромаштија, недостаток на храна, постојани преселби, нестабилни старатели и загуба на единствената возрасна личност што ја доживувала како извор на љубов и сигурност“, се наведува во нивната петиција.

Групата „Mercy for Christa“ исто така упати апел до гувернерот, тврдејќи дека „доживотниот затвор е соодветна казна за неа“. Тие истакнуваат дека Пајк претрпела тешко злоставување како дете, што оставило трајни физички и психолошки последици.

„На грбот носи мрежа од лузни од претепувањата што ги претрпела како дете. Овие трауми од детството ѝ предизвикале тешко посттрауматско стресно растројство“, се додава во петицијата.

Според тековниот план, погубувањето на Криста Пајк со смртоносна инјекција е закажано за 30 септември.