(Видео) Млад човек турна жена на шините на метрото во Брисел, за „влакно“ избегната трагедија

Во инцидентот во Брисел една жена за „влакно“ избегна смрт. Млад човек намерно ја турнал на шините на метро станицата, но за среќа возот успеал навреме да застане. Инцидентот се случил во петокот вечерта околу 19:45 часот на метро станицата Рожие во Брисел.

На жената веднаш ѝ помогнале луѓе кои случајно се нашле на станицата на метрото во тој момент, потврдија од СТИБ, јавното транспортно претпријатие во Брисел.

„Возачот добро реагираше, но тој е во шок, како и жртвата“, изјави за Brussels Times портпаролот на STIB, Ги Саблон.

На снимката од надзорната камера се гледа како насилникот оди напред-назад по платформата, а потоа ја турка жената одзади на шините. Други луѓе кои стоеја на платформата ѝ помогнаа да се качи од шините и да се врати на платформата.

(⚠️Vidéo choc)
Tentative de meurtre dans la station de métro Rogier à Bruxelles ce vendredi vers 19h40. pic.twitter.com/dT0ag5qEFu

— Infos Bruxelles🇧🇪 (@Bruxelles_City) January 14, 2022

На местото на настанот веднаш била повикана полиција и брза помош. Жената и возачот на метрото се пренесени во болница, а откако им била укажана потребната нега, пуштени се дома.

Насилникот избегал, но во меѓувреме е уапсен, потврдија во саботата наутро од Јавното обвинителство на Брисел. Тој бил сослушан од истражен судија и приведен за убиство во обид. Истражниот судија назначил психијатриско вештачење да ја провери неговата состојба.