(Видео) Интерпол бара помош: Со години се обидува да го открие идентитетот на овие 22 убиени жени

Интерпол апелираше до јавноста да помогне во идентификувањето на телата на 22 жени убиени во Германија, Холандија и Белгија во период од неколку децении, чии идентитети никогаш не биле утврдени. Интерпол сака да ги реши овие „заборавени случаи“ на убиства на жени што се случиле пред 10, 20, 30, па дури и 40 години и започна операција наречена „Идентификувајте ме“.

Најстариот случај датира од октомври 1976 година, кога телото на непозната жена беше пронајдено на паркинг покрај автопат во Холандија, а последниот е од август 2019 година. Се работи за жена чие тело е пронајдено во градски парк во Белгија.

Националните полиции не успеваа да ги идентификуваат жртвите и поради фактот што овие жени не потекнуваат од земјите каде што се убиени. За секоја од 22-те жртви, објавени се фотографии направени со помош на технологија за реконструкција на лицето и информации за тоа кога биле пронајдени телата, заедно со лични предмети пронајдени кај жртвите.

„Ако се сеќавате на пријателка, член на семејството или колешка која ненадејно исчезнала, ве молиме погледнете добро и контактирајте ја националната полиција преку формуларот доколку имате какви било информации за исчезнатите“, се вели на веб-страницата на Интерпол.

Франсоа-Ксавиер Лоран, шеф на базата на податоци за ДНК во Интерпол, изјави за АФП дека се верува дека некои од убиените жени се од источноевропските земји.

„Можно е да се работи за жени кои заминале на туристичко патување, но можно е и да се жртви на трговци со луѓе“, изјави Лоран. Случаите не се поврзани, но имаат „меѓународен контекст“, додаде тој.