Ветерните електрани кај Богданци произведоа за 37,5 отсто повеќе струја од планираното

Паркот на ветерни електрани „Богданци“ до крајот на август испорачал над 87 гигавати електрична енергија со што го надмина планираното производство за тој период за 37,5  отсто.

Тоа значи дека на четири месеци до крајот на календарската година, овој производствен капацитет остварил над 91 проценти од годишниот производствен план предвиден во енергетскиот биланс.

– Производството на ВЕЦ Богданци во првата половина од 2020 година заклучно со 30-ти јуни е 68.452 мегавати или 43,5 отсто повеќе од планираните 47.712 мегавати. Ова е рекордно производство во првото полугодие од постоењето на ВЕЦ Богданци, информираа денеска од Електрани на Северна Македонија.

Оттаму велат дека реализираното производство е поголемо од планираното поради поволните временски услови и ветрови поголеми од 4 метри во ссекунда.

Со реализација на втората фаза целосно ќе се заокружи проектот „Ветерен парк Богданци“ на проектираната инсталирана моќност од 50 мегавати и вкупно годишно производство од околу 137 гигавати. Втората фаза, за кој постапката за реализација е во тек,  се состои од 4 до 6 турбини, секоја со номинална моќност од 3 до 4 мегавати. Со оваа фаза ќе се изврши зголемување на капацитетот на постоечкиот Парк на ветерни електрани за дополнителни 13,2-15 мегавати. Планираната инвестиција е 21 милиони евра, од кои 18 милиони евра се од германската КфВ банка и 3 милиони евра средства на АД ЕСМ.