Весна Петрушевска во режисерски води – почнаа пробите за „Бог на колежот“ во МНТ

Почнаа читачките проби на претставата „Бог на колежот“, која е копродукциски проект, по текст на светски познатата француска авторка, Јасмина Реза, а во режија на Весна Петрушевска, соопштија денеска од Македонскиот народен театар (МНТ).

Како што посочуваат, станува збор за еден од најпоставуваните текстови на Реза, напишан во 2006 година, за кој добива и многубројни награди. 

Режисерката Петрушевска го одбира овој текст на оваа брутално црна комедија, која безмилосно ја разобличува современата елита, притоа користејќи иронија и сарказам за да предупреди на дволичноста на човечката природа.

-Текстот изобилува со брилијантни дијалози и извонредна веродостојност на ликовите на два брачни пара кои ги играат: Ѓорѓи Јолевски, Дарја Ризова, Симеон Мони Дамевски, Наталија Теодосиевa, а кавгата меѓу двете момчиња е причината родителите да ја преземат контролата врз нивните односи. Односите стануваат сè понапнати, ситуацијата ескалира и се претвора во меѓусебни обвинувања и општо пресметување во се поголеми размери. Паровите водат психолошка војна, а на виделина излегуваат и долго скриените несогласувања во двата брака, се вели во соопштението на МНТ.