Вештачки лисја произведуваат електрична енергија користејќи ветер и дожд

Италијанските научници измислиле вештачки лист кој може да се додаде во растенијата за да произведува електрична енергија со помош на капки дожд и ветер.

Системот работи фантастично во услови на дожд и ветар и може да го напојува LED осветлувањето и сам да се напојува. Фабијан Медер, истражувач кој ја проучува био-инспирираната мека роботика на Италијанскиот институт за технологија (IIT) во Џенова, рече дека системот може да биде практичен за земјоделски апликации и далечинско следење на животната средина за да се набљудува здравјето на растенијата или да се следат климатските услови.

За да може уредот да работи, се додава на листовите на вистинско растение.

„Кога листовите се движат на ветрот, двете површини се допираат една со друга и повторно се одвојуваат, создавајќи статички полнеж на кутикулата на листовите на растението и на нашиот уред. Овие полнежи се индуцираат во внатрешното клеточно ткиво на растението, каде што создаваат струја. Оваа струја можеме да ја собереме со помош на електрода вметната во растителното ткиво“, изјави Медер за IEEE Spectrum.

Претходно видовме вештачки лисја кои користат слична техника за производство на електрична енергија од ветерот, но процесот на собирање енергија со помош на капки дожд е нов.

Истражувачите го всадиле својот систем на вештачки лисја во лисјата на живо растение олеандер и ја процениле неговата способност да произведува енергија. Резултатите покажаа дека поединечните капки можат да генерираат напон и струја поголема од 40 волти и 15 микроампери и можат да напојуваат 11 LED светилки.

„Резултатите покажаа дека собирањето енергија од ветер и дожд е можно со овој уред, одделно или истовремено, што го прави мултифункционален собирач на енергија или сензор што се напојува самостојно“, рече Барбара Мацолаи, директорка на Лабораторијата за мека роботика на IIT.

Таа објасни дека главната предност на овој систем за собирање енергија во однос на другите слични модели е тоа што всушност може да произведе повеќе електрична енергија во влажни услови. Другите вештачки лисја ја губат својата ефикасност кога се влажни.

Истражувачите сега работат на подобрување на перформансите на овој вештачки лист преку модификации на дизајнот, како што се формите на електродите и избраните материјали. Тие сакаат да ги тестираат системите во надворешни и многу променливи услови на ветер и дожд.