Вечер на тоалети и смокинзи: Виенски бал на 14 март во Скопје

На 14 март, во хотелот „Александар палас“  традиционално, по 21-ви пат, ќе се одржи Виенскиот Бал во Скопје, под покровителство на амбасадата на Република Австрија во нашата земја, а во организација на Здружението за културна соработка Јохан Штраус. Единствена вечер каде доаѓа до израз вашата елеганција со задолжителните вечерни тоалети и смокинзи. Вечер кога гостите го живеат стилот на Виена – со захер торта, шампањско и виенска шницла и танцуваат валцер на музиката на Штраус. Кој не умее да игра валцер, има шанса да заигра на звуците на светски евергрини и македонски хит рефрени.

По традиција, на Виенскиот бал се меша народот со елита, и не се канат политичари. Исклучок беше ланскиот бал, за чиј 20-ти јубилеј беа поканети премиерот Зоран Заев и неговата сопруга Зорица.

Виенскиот бал во Скопје, кој од 2017 година е ставен и на светската мапа на виенски балови, и оваа година ќе има хуманитарна димензија. Дел од средствата од продадените  билети ќе одат за СОС Детско село.

Во уметничката програма ќе настапат врвни уметници: Оркестарот „Јохан Штраус“ ќе музицира под диригенство на Бисера Чадловска. Ќе настапат првенците на Балетот од  Националната опера и балет Саша Ефтимова и Балаж Локсен (Унгарија),  танчери на Танцовиот клуб Прима Данца, Тумбао Салса Бенд,  Арт Бенд и вокалните солисти:  Драган Бобиќ – Дексо,  Калина Велковска  и  Паула Ц. (САД).

Водител на манифестацијата и годинава како и лани е манекенката и ексмис на Македонија Вера Мештеровиќ.