Ватикан: Папата Франциско попладнево ќе има операција на абдоменот во римската болница Гемели

На папата Франциско попладнево ќе му биде извршена операција на абдоменот во римската болница Гемели, соопшти Ватикан.

Оттаму додаваат дека неговиот лекарски тим одлучил дека е потребна операција и дека се очекува папата да остане во болница неколку дена заради закрепнување.

Агенцијата АНСА јави дека процедурата ќе трае околу два часа и дека папата ќе биде под општа анестезија.

Папата Франциско требаше да биде однесен во болница уште утринава, по аудиенцијата во Ватикан, на која не ја спомена планираната операција. Тој вчера мина 40 минути на прегледи во болницата Гемели.

Папата, кој во март ја одбележа 10-годишнината од неговиот понтификат, често користи инвалидска количка или стап за одење поради болки во коленото.

Во јули 2021 година му беше отстрането дел од дебелото црево. Папата минатата година изјави дека не сака да го оперира коленото бидејќи општата анестезија при операцијата на дебелото црево му предизвикала непријатни несакани ефекти.