Ватикан ја пофали одлуката на Врховниот суд на САД, реакции од целиот свет: „Ограничувањето го прави абортусот посмртоносен“

Папската академија за живот ја пофали одлуката на Врховниот суд на САД, кој им овозможи на сојузните држави да го забранат абортусот. Во исто време, ОН објавија дека ограничувањето на пристапот до абортус не ги спречува луѓето да го вршат.

Папската академија за живот во петокот ја пофали одлуката на Врховниот суд на САД, која им дозволи на федералните држави да го забранат абортусот, велејќи дека пресудата е „предизвик за целиот свет“ за животни прашања.

Папската академија за живот, исто така, во соопштението вели дека одбраната на човечкиот живот не може да се ограничи на индивидуалните права, бидејќи животот е прашање од „пошироко општествено значење“.

„Фактот што голема земја со долга демократска традиција го промени својот став по ова прашање е предизвик за целиот свет“, се вели во соопштението на Академијата, пренесе Хина.

Надбискупот Винченцо Паља, кој ја предводи Папската академија за живот, рече дека одлуката на судот е „силен повик за размислување“ за ова прашање во време кога „западното општество ја губи својата страст за живот“.

„Изборот на животот е наша одговорност за иднината на човештвото“, рече Паља.

ООН: Ограничувањето на абортусот само го прави посмртоносен

Ограничувањето на пристапот до абортусот не ги спречува луѓето да го вршат и „тоа само го прави посмртоносен“, изјави портпаролот на генералниот секретар на ОН, Антонио Гутереш, откако Врховниот суд на САД ја поништи легализацијата на абортусот од 1973 година.

„Сексуалното и репродуктивното здравје и права се основата на животот со право на избор, зајакнување и еднаквост за жените и девојките ширум светот“, изјави портпаролот Стефан Дујарик за новинарите.

Агенцијата на ОН за сексуално и репродуктивно здравје (УНФПА) наведува дека „неверојатни 45 отсто од сите абортуси во светот се ризични, што ги прави најголема причина за смрт на мајките“.

Одлуката на САД е „голем чекор наназад“ и „огромен удар за човековите права на жените и родовата еднаквост“, се вели во соопштението на шефицата на ОН за човекови права Мишел Бачелет, пренесува Дневник.хр.

Се огласи и Макрон

Францускиот претседател Емануел Макрон во петокот изјави дека абортусот е основно право на жената.

„Мораме да го заштитиме. Сакам да ја изразам мојата солидарност со сите жени чии слободи беа доведени во прашање од Врховниот суд на САД денеска“, напиша Макрон на Твитер.

За потсетување, Врховниот суд на САД во петокот ја поништи пресудата од 1973 година со која се легализираше абортусот на национално ниво, одлука за прашање што предизвикува една од најгорките поделби во американскиот политички живот.

Abortion is a fundamental right for all women. It must be protected. I wish to express my solidarity with the women whose liberties are being undermined by the Supreme Court of the United States.

— Emmanuel Macron (@EmmanuelMacron) June 24, 2022