Вајдел прогласи победа на покраинските избори и побара оставка на Мерц
Копретседателката на Алтернатива за Германија (АфД), Алис Вајдел, прогласи политичка победа на нејзината партија по изборите во Берлин и Мекленбург-Западна Померанија и побара германскиот канцелар Фридрих Мерц да поднесе оставка.
„АфД е јасно новата народна партија во Германија. Ја надминавме ЦДУ и народот сака политички промени“, изјави Вајдел.
Таа вели дека ЦДУ со Мерц не може да продолжи по досегашниот начин на владеење и директно побара негова оставка.
„Фридрих Мерц мора да ги извлече последиците. Тој мора да го направи тоа за својата партија и за Германија“, изјави Вајдел.
Во Берлин, прва е Левицата со околу 25 отсто, додека ЦДУ е на второто место со околу 20 отсто. АфД освои околу 16 отсто, Зелените околу 15 отсто, а СПД околу 12 отсто. Резултатите во двете покраини имаат различен политички исход: АфД е најсилна во Мекленбург-Западна Померанија, додека Левицата го освои првото место во Берлин.
Мерц го призна лошиот резултат на ЦДУ во Мекленбург-Западна Померанија и го опиша како „катастрофа“. Сепак, германскиот канцелар не најави оставка. Тој порача дека ќе продолжи со реформите на неговата влада и дека Германија се соочува со сериозни економски и општествени предизвици.
Вајдел, од друга страна, оцени дека резултатите покажуваат дека АфД ја надминала ЦДУ како „народна партија“ и побара промена на политичкиот курс. Таа истовремено најави дека АфД на подолг рок сака да разговара со ЦДУ за можни форми на политичка соработка, иако ЦДУ е политички дистанцирана од АфД.
Изборите во Берлин и Мекленбург-Западна Померанија претставуваат дополнителен тест за владата на Мерц, но резултатите од покраинските избори сами по себе не значат промена на составот на федералната влада.