Ужасот продолжува: Руските трупи користат пациенти како жив штит во Украина (ВИДЕО)
КИИВ – Руските воени сили денес го напаѓаат главниот град на Украина и другите поголеми градови во обид да ја уништат украинската одбрана која го фрустрира нивниот напредок речиси три недели по инвазијата. Поради застојот на копнениот напредок на Русија кон Киев и покрај континуираното бомбардирање, се појави трошка оптимизам дека разговорите меѓу двете страни би можеле да постигнат напредок. Украинскиот претседател Володимир Зеленски изјави дека преговорите ќе продолжат и дека барањата на Русија за прекин на војната стануваат „пореални“.
Во меѓувреме Русија фрли гранати во областите околу Киев и во градот, каде што 12-катна станбена зграда избувна во пламен откако беше погодена од шрапнели. Руските сили ги интензивираа борбите во предградијата, особено околу градот Буча на северозапад и автопатот што води на запад кон Житомир. Дванаесет градови околу Киев се без вода, а шест без топлина. Низ главниот град, „градинките, музеите, црквите, станбените блокови и инженерската инфраструктура страдаат од бескрајното гранатирање“, рече шефот на дипломатијата Дмитро Кулеба.
Зеленски рече дека руските сили не успеваат да навлезат подлабоко на украинска територија, но продолжуваат со тешкото гранатирање на градовите. Тој рече дека руските трупи се обидуваат да ги прекинат транспортните врски со главниот град и да ги уништат логистичките способности додека планираат напад од широк опсег за заземање на главниот град. Висок официјален претставник на американската одбрана, рече дека Русите користат оган од долг дострел за да погодуваат цивилни цели во Киев со зголемена фреквенција, но дека нивните копнени сили постигнуваат мал или никаков напредок низ земјата. Тој смета дека руските војници се уште се на околу 15 километри од центарот на главниот град.
Руските сили успеаја да го окупираат градот Иванкив, 80 километри (50 милји) северно од Киев, и да го контролираат околниот регион на границата со Белорусија. Покрај воздушните напади и гранатирањето на копнените сили, руските поморски бродови во текот на ноќта пукале врз град јужно од Мариупол на Азовското Море и друг во близина на Одеса на Црното Море, според локалните власти.
Украина се чини има успеси на фронтот, откако излегоа сателитските фотографии од Planet Labs PBC на кои се гледаат хеликоптери и возила запалени на меѓународниот аеродром Керсон и воздухопловната база, кој е под контрола на Русија. Канцеларијата на Зеленски соопшти дека украинските сили ги спречиле руските напори да влезат во Харков, вториот по големина град во Украина, кој беше погоден од речиси непрекинати напади во последните 24 часа. Силна експлозија одекна низ градот во текот на ноќта.
Работниците во болницата се најдоа на две линии на фронтот, борејќи се со Ковид -19 во единиците за интензивна нега додека војната беснее надвор. Сирените за воздушен напад излегуваат повеќе пати дневно, принудувајќи ги кревките пациенти да влезат во импровизираното засолниште за бомби на во Регионалната болница за клинички инфективни болести во Харков, рече директорот на болницата, д-р Павел Нартов. Лекувањето на пациените е тешко и опасно со оглед на опасноста од изложување на резервоарите со кислород на бомбашки напади и шрапнели, рече тој.
„Бомбардирањето се случува од утро до вечер. Фала богу, бомба сè уште не ја погоди нашата болница. Но, може да погоди во секое време“, изјави Нартов за Асошиетед прес.
Портпаролот на руското Министерство за одбрана Игор Конашенков изјави дека руските сили уништиле 111 украински авиони, 160 беспилотни летала и повеќе од 1.000 тенкови или други воени возила од почетокот на, како што Русија ја нарекува својата „специјална воена операција“ во Украина. Секојдневните јавни изјави на руската војска за војната се фокусираат речиси исклучиво на борбите во регионите Доњецк и Луганск, кои се под контрола на сепаратистите, и на цели на украинската војска, без да се признаат нападите врз цивили.
Украинската вицепремиерка Ирина Верешчук во средата изрази вознемиреност од извештаите дека руските сили во вторникот зеле 400 медицински лица и цивилни жители како заложници во болницата во опколениот јужен пристанишен град Мариупол, за кој војната веќе предизвика некои од најголемите страдања. Русите ја користат болницата како стрелачка позиција, рече Верешчук. Таа рече дека руските сили пукале врз хуманитарни конвои и собирни точки за евакуираните, што ја отежнува работата за отворање конвои за помош и евакуација во средата, откако илјадници успеаја да го напуштат Мариупол во вторникот.
Украинските власти дадоа различни бројки за тоа колку луѓе биле успешно евакуирани од Мариупол досега и колку од нив стигнале до Запорожје, град на 227 километри (141 милји) западно определен како крај на рутата за евакуација.Регионалниот лидер Павло Кириленко во вторникот рече дека руските војници принудиле околу 400 луѓе од околните домови во Регионалната болница за интензивна нега и ги користеле нив и околу 100 пациенти и персонал како жив штит, не дозволувајќи им да си заминат. Кириленко рече дека гранатирањето веќе сериозно ја оштетило главната зграда на болницата, но медицинскиот персонал лекувал пациенти во импровизираните одделенија во подрумот.
Лекарите од другите болници во Мариупол направиле видео за да му кажат на светот за ужасите што ги гледале. „Не сакаме постхумно да бидеме херои и маченици“, рече една жена. Таа, исто така, рече дека е недоволно да се осврне на пациентите што се лекуваат како ранети: „Тоа се пациенти со откинати раце и нозе, извадени очи, тела искинати на фрагменти, а внатрешноста испаѓа“.
Инаку, сателитската снимка на „Планет Лабс“ потврдува дека украинските сили оштетиле и уништиле голем број руски хеликоптери и предизвикале друга штета, во денешниот напад врз воздухопловната база Керсон во јужниот дел на земјата што ја држат руските сили. Ова е втор голем украински напад за две недели врз оваа база. Руските сили прво тврдеа дека ја презеле контролата врз Керсон, кој зазема стратешка локација на северниот брег на реката Днепар, пред околу две недели.
Фотографијата е направена вчера напладне. На неа може јасно да се видат повеќе големи пожари, вклучително и голем број запалени хеликоптери. Густиот црн чад што излегува од различни точки ја прикрива дополнителната штета надвор од она што е лесно видливо, бидејќи се укажува на тоа дека основната инфраструктура во базата е оштетена или уништена.
На Видеото подолу е сцена од Мариупол, најнапаѓаниот град од руските сили, каде има ново „нормално“ – деца поминуваат покрај човечки труп бидејќи веќе секојдневно се сведоци на вакви сцени.
Mariupol. Citizens killed by Russians lie on the streets and city residents who are trying to survive.
The city continues to resist, waging a constant struggle between life and death.
Video: Dom pic.twitter.com/zT47jth4gw— Oleksandra Matviichuk (@avalaina) March 16, 2022