Ужас на руската телевизија – концентрациони кампови, стерилизација за оние што се против знакот „Z“
Познат водител на руската државна телевизија во емисија предупреди дека противниците на руската војна во Украина ќе се соочат со остри казни, вклучувајќи „концентрациони логори и стерилизација“.
Карен Шахназаров, изразит про-Путин филмаџија, рече дека за сите „противници на буквата Z“ – симболот на руската инвазија – „нема да има милост“.
„Противниците на буквата Z mора да разберат дека ако сметаат на милост, не, нема да има милост за нив“, рече Шахназаров, кој го води филмското студио „Мосфилм“, поддржано од државата, на државниот руски телевизиски канал Русија 1.
Шахназаров подоцна тврдеше дека неговите коментари биле извадени од контекст.
Со сличен тон како оној на Шахназаров, Путин неодамна ги спореди опозициските фигури со „мушички“ и „предавници“ кои се обидуваат да ја ослабат земјата по налог на Западот. Рускиот претседател повика општеството да се „прочисти“ од опозицијата.
„Рускиот народ секогаш ќе може да ги разликува вистинските патриоти од ѓубриња и предавници и едноставно ќе ги плукне како комарец што случајно им влетал во устата – ќе ги плукне на тротоарот“, рече Путин во март.
„Убеден сум дека таквото природно и неопходно самопрочистување на општеството само ќе ја зајакне нашата земја, нашата солидарност, сплотеност и подготвеност да одговориме на какви било предизвици“.
Затворениот руски опозициски лидер Алексеј Навални вчера изјави дека стравува дека Кремљ се подготвува да го испрати во затвор познат по тортура и по сексуалното насилство, во обид да го спречи да зборува против инвазијата.
„Слушнав гласини дека ќе бидам префрлен во колонијата со висока безбедност во Мелехово, каде што на осудениците им се вадат ноктите“, напиша тој на својот Твитер профил.
Строгата режимска максимално безбедносна казнена колонија во Мелехово е позната по бруталните тепања и силувањата на машките затвореници.
Навални беше осуден за измама и осуден на дополнителни девет години во затвор со максимална безбедност во март, откако веќе доби казна од три години и осум месеци за „проневера“, што значи вкупно 13.
Стотици Руси сега се соочуваат со обвиненија дека зборувале против војната во Украина, откако во март беше усвоен репресивниот закон со кој се забранува ширењето на „лажни информации“ за инвазијата и омаловажувањето на војската.
Групите за човекови права велат дека репресијата доведе до кривично гонење и можни затворски казни за најмалку 23 лица под обвинение за „лажни информации“, а над 500 други се соочуваат со прекршочни обвиненија за омаловажување на војската
„Ова е голем број, невидено голем број на случаи“, рече Дамир Гајнутдинов, шеф на групата за правна помош Net Freedoms која се фокусира на случаите на слобода на говорот.
Кремљ се обиде да го контролира наративот на војната од моментот кога неговите трупи влегоа во Украина.