Утре во Солун прв состанок на Комисијата за трговски ознаки

Комисијата за трговските ознаки и трговските имиња утре ќе одржи прв состанок во Солун, откри алтернативната министерка за надворешни работи на Грција, Сиа Анагностопулу за време на расправата во грчкиот Парламент за ратификација на законите што произлегуваат од потпишаните договори во Скопје во март и април годинава за отворање на нови гранични премини.

-Утре заседава за прв пат, комисијата што е одредена под покровителство на Министерството за надворешни работи за темите за трговските ознаки, трговските имиња и слично. Утре заседава, за прв пат во Солун и таму од бизнисмените од двете страни се поставуваат темите кои останаа нерешени се додека не се потпиша Договорот од Преспа, рече Анагностопулу, одговарајќи на прашањето на пратениците од Нова демократија поставено вчера за време на Комисијата за национална безбедност и надворешна политика.

Во однос на ратификацијата на двата договори, кои беа темата на денешната пленарна седница, Анагностопулу рече дека се гледа практичната придобивка од Договорот од Преспа и истакна дека отворањето на граничните премини било барање на локалното население.

-Не дојдоа од небо овој закон и овие договори, напротив имав голем притисок од локалното население да дојде законот пред Велигден и иако им го ветев тоа и им се извинувам, не успеавме порано бидејќи беше потребно време за законодавната постапка. Тоа беше итно барање од локалното население, објасни  алтернативната министерка за надворешни работи на Грција и додаде дека и за граничниот премин кај Преспа, локалното население уште од 1967 година кога и се затвори, барало повторно отворање.

Анагностопулу уште еднаш категорично повтори дека без Договорот од Преспа и со претходната рамката што ги одредуваше односите на двете земји не можеше да се отворат граничните премини, бидејќи таа рамка беше истата со онаа од 1959 меѓу Грција и Југославија. Таа истакна дека во грчкиот Парламент, никогаш претходно не дошол никаков закон што се однесува на двете земји, затоа што постоеше проблемот со името.

-Договорот од Преспа ги одврза рацете и на грчката држава и на Република Северна Македонија. Потребен беше овој договор, рече Анагностопулу.

Во однос на финансирањето на граничните премини, алтернативната шефица на грчката дипломатија објасни дека ќе биде од европски програми.

-За Лемос кај Лерин, веќе се обврзани четири милиони евра од програмата Интерег.  Четириесет милиони евра останати од „Егнатија одос“ за регионот на Пела. Градоначалникот на Преспа и префектот на областа Западна Македонија дојдоа кај мене во канцеларија и ме притискаа пред Велигден да се озакони договорот, прекуграничниот премин. Ми рекоа дека периферијата ги презема потребните трошоци за да оди напред овој проект. Тоа е развоен проект и во двата случаи, и во Пела и во регионот на Лерин, рече Анагностопулу.