Утре почнува саемот на книгата на отворено и со сертификат
Под мототот „Читањето може да биде опасно…добро“ утре започнува саемот на книгата на кој ќе бидат организирани 33 промоции на нови изданија.На саемот ќе земат учество над 60 издавачки куќи кои најавија претставување на своите најнови изданија, кои покрај промоциите, најавуваат и големи саемски попусти до 70%.
Во периодот од 8 до 13 септември, во Промотивниот центар во рамките на Саемот на книга ќе се реализираат промоции на нови изданија од : Државниот Архив на РСМ, Книгохоличари, Бата Прес, Арс Ламина, Топер, Полица, Едука Мак, Издавачки центар ТРИ, Деа Балкански, Паблишер, Библиски Центар Божилак, Издавачки Центар Јени Балкан.
Во рамките на работната програма ќе се одржи и традиционалното доделување на награди од страна на Македонската Aсоцијација на Издавачи (МАИ) и доделување на награди од Здружението на издавачите и книжарите на Македонија (ЗИКМ).
Саемот на книга е организиран во соработка со Македонската Асоцијација на издавачи, Здружението на издавачите и книжарите на Македонија – ЗИКМ, Здружението на албанските издавачи од Македонија и Сојузот на албански издавачи во Македонија и е поддржан од Министерството за култура на Република Северна Македонија.
Програмата и распоредот на промоции се објавени на социјалните медиуми и на веб страната на следниот линк: https://bit.ly/3DTDPUs
Саемот за книгата ќе се одржи на отворено, непосредно до Аква паркот (А1 Арена – СЦ Борис Трајковски), од 8 до 14 септември и ќе се одвива согласно сите здравствени протоколи за заштита на јавното здравје (носење маска, држење дистанца од два метри и дезинфекција), со тоа што при влез на саемот потребно е посетителите да прикажат сертификат за вакцинација или сертификат за прележан Ковид-19 за сите лица над 18 години.
Билети за саемот на книга ќе може да се купат преку on-line електронскиот систем www.karti.com.mk или на билетарите пред саемот. За најбројната публика, млади лица до 18 години билетот чини само 20 денари.Работното време на саемот во периодот од 8 до 11 септември е од 10-21 часот, на 12 и 13 септември од 10-20 часот, а на 14 септември од 10-17 часот.