Условна казна затвор од шест месеци за уредникот на „Инфомакс“


Условна казна затвор од шест месеци, доби уредникот на порталот „Инфомакс“, Александар Митовски, а пресудата беше изречена денеска во Основниот кривичен суд во Скопје.

Казната нема да се изврши ако Митовски во наредните две години не стори кривично дело.

Обвинителниот предлог за Митовски беше поднесен во септември лани за делото оддавање службена тајна откако тој на порталот „Инфомакс“ објави дел од записникот за кривичната пријава која ја поднесе Орце Камчев за случајот „Рекет“.

„Обвинетиот на 23 август, преку интернет-порталот www.infomax.mk, на јавноста ѝ ги сторил достапни податоците што претставуваат службена тајна. Имено, тој ја објавил првата страница од записник за примање кривична пријава од едно лице заведен во Основното јавно обвинителство за гонење на организираниот криминал и корупција“, наведоа тогаш од Обвинителството.