Улично куче спасило бебе фрлено во црно кесе во Либан

Новородено девојче е пронајдено напуштено во вреќа за отпадоци што ја носело улично куче  во северниот либански град Триполи во средата, објавија локалните медиуми, што доведе до бес низ целата земја поради инцидентот.

Десетици луѓе ширум Либан се огласија на социјалните мрежи за да го осудат напуштањето на новороденчето и понудија да го посвојат, откако фотографиите од бебето со модринки на лицето и телото станаа вирални.

Според извештаите, случаен минувач го слушнал плачот на новороденчето од црна пластична обвивка што кучето го влечело покрај зградата на градската општина. Пешакот го спасил девојчето, кое наводно било старо само неколку часа во моментот кога било пронајдено и го однел во Исламската болница пред новороденчето да биде префрлено во владината болница во Триполи за дополнителна медицинска помош. Нејзината состојба е сериозна, но стабилна. Властите соопштија дека истрагата е во тек.

Ова бебе беше фрлено во област која се смета за многу опасна ноќе, бидејќи може да се најдат многу кучиња скитници. Општината претходно се обиде да ги отруе овие кучиња, но организациите за заштита на животните одбија и повикаа на нивна заштита.

Иако не е познато зошто бебето е напуштено, многумина укажаа на длабоката економска криза во земјата. Извештајот на Хјуман рајтс воч од 2022 година откри дека повеќе од половина од  Либанците не можат да си дозволат соодветно греење, облека или образование. Дополнително, 43% од населението изјавиле дека не можат да платат за медицинска нега, а 42% изјавиле дека не можат да си дозволат грижа за децата.

Ова не е прв случај куче скитник да спаси напуштено дете. Во 2005 година, куче во Најроби пронашло новороденче во пластична кеса и го однело детето назад кај нејзиното легло од кученца. Бебе оставено на поле во рурална Аргентина, во 2008 година, исто така било засолнето од куче скитник додека властите не го пронашле детето.