Украинец уапсен во Пула заради експлозијата на Северен тек

Украинец е уапсен денес во Хрватска под сомнение за поврзаност со подводните експлозии што ги оштетија гасоводите „Северен тек“ меѓу Русија и Германија во 2022 година, објави германското федерално обвинителство, како што објави Асошиејтед Прес.

Украинецот Владимир З., чие целосно име не е објавено во согласност со германските закони за приватност, е уапсен од хрватската полиција во Пула врз основа на европска потерница, според АП.

Хрватската полиција сè уште не известила за апсењето на својата официјална веб-страница.

Подводните експлозии на 26 септември 2022 година сериозно ги оштетија гасоводите изградени за транспорт на руски природен гас до Германија на дното на Балтичкото Море. Оваа саботажа дополнително ги зголеми тензиите околу војната во Украина во време кога европските земји, по почетокот на сеопфатната руска инвазија на Украина, брзо ја прекинуваа својата зависност од руските извори на енергија.