УЈП влегува во фирмите поврзани со „Рекет“

Управата за јавни приходи влегува во фирмите поврзани со случајот „Рекет“. Од петок ќе го проверува работењето на фирмите „БМЈ медиа груп“, „Меѓународен сојуз“ и телевизијата „1 ТВ“.

„Ние ќе постапиме во делот кој што се однесува на даноците, до петок ќе дадеме налози за отпочнување на контрола и во ‘Меѓународниот сојуз’ , во ‘1 ТВ’, исто така и во ‘БМЈ медиа груп’ и кај сите останати даночни обврзници со коишто сме утврдиле преку анализата дека постоеле одреден вид на деловни односи. Исто така ќе направиме контрола и на сите оние засегнати физички лица во телата и органите на ‘Меѓународниот сојуз’ за коишто ќе ги утврдиме исплатите кои што се направени“, изјави директорката на УЈП Сања Лукаревска.

Фирмите ќе бидат контролирани по основ на сите даноци и придонеси а за физичките лица контролата ќе се врши за персонален данок на доход, објасни Лукаревска. Ќе се проверува на чии сметки се префрлувани пари и по кој основ. Доколку има индиции, за физичките лица може да следи посебна постапка за утврдување на потекло на имот, објасни Лукаревска.