УЕФА го премести финалето на Суперкупот од Русија во Грција и воведе измени во Лигата на нации
Атина на место на рускиот град Казањ ќе биде домаќин на Суперкупот за оваа сезона, одлучи денеска УЕФА на состанокот на Извршниот одбор на Нион на кој воведе и измени во системот на натпреварување во Лигата на нации и во квалификациите за пласман на европските и светските првенства почнувајќи од следниот циклус.
Од следното издание на Лигата на нации во сезоната 2024/25 се воведува четвртфинале за пласман на финалниот турнир, како и плејоф натпревари за промоција и испаѓање во дивизиите А, Б и Ц кои ќе се играат во март на домашен и гостински терен.
Измени се воведени и во форматот на квалификации при што по завршувањето на ЕУРО 2024 за пласман на Мундијалот 2026 ќе се формираат 12 групи со по четири и пет репрезентации.
Финалето на годинешното издание на Суперкупот ќе се одржи на стадионот „Јоргос Караискакис“ во Атина на 16 август.