„Тврдината Австралија“ ги отвора портите за туристите по две години

Австралија повторно ќе ги отвори границите за целосно вакцинирани туристи од 21 февруари, најави премиерот Скот Морисон, ставајќи крај на некои од најстрогите и најдолгите ограничувања за патување со пандемијата во светот.

„Поминаа речиси две години откако ја донесовме одлуката да ги затвориме границите кон Австралија“, рече Морисон за време на брифингот за медиумите во понеделникот.

 „Ако сте двојно вакцинирани, со нетрпение очекуваме да ве поздравиме назад во Австралија“.

Австралија ги затвори своите граници во март 2020 година за да се заштити од зголемената пандемија на Ковид-19.

Поголемиот дел од времето оттогаш на Австралијците им беше забрането да заминуваат, а само мал број посетители добија исклучоци за влез.

Правилата ги поделија семејствата, ја загрозија големата туристичка индустрија во земјата и поттикнаа понекогаш жестоки дебати за статусот на Австралија како модерна и отворена држава.

Со воведувањето на својата програма за вакцинација минатата година, владата на Морисон полека ги релаксира правилата за Австралијците, жителите со регулиран престој и студентите.

Со одлуката од понеделникот ќе бидат укинати речиси сите преостанати ограничувања.

Меѓународната асоцијација за воздушен транспорт (ИАТА) рече дека „во голема мера го поздравила“ потегот.

„Азиско-пацифичкиот регион беше многу внимателен во својот пристап кон ограничувањата на границите досега, но во последниве недели, видовме растечки импулс кон релаксирање на ограничувањата за патување – на Филипините, Тајланд и до одреден степен Нов Зеланд“, рече во соопштение Филип Гох, регионален потпретседател на ИАТА за Азија Пацифик.

„Ги повикуваме другите влади во Азија Пацификот да гледаат на слично понатамошно олеснување на нивните гранични ограничувања за да им овозможат на воздухопловните бизниси да го забрзаат своето толку потребно закрепнување и да донесат максимална корист за нивните економии“, нагласи тој.

Во поголемиот дел од пандемијата, Австралија го следеше она што го нарече политика „Нулта ковид“, која вклучуваше строги брзи заклучувања. Но, таа ја напушти политиката откако воведе вакцини.

Околу 79 отсто од австралиското население сега прими две дози вакцина против Ковид-19, а земјата продолжи со олеснување на ограничувањата дури и кога варијантата Омикрон почна да ги зголемува инфекциите.

Изминатата недела забележа забавување на дневните инфекции и приеми во болница, при што Австралија објави нешто повеќе од 23.000 нови случаи во понеделникот.

Бројката го означува најмалиот дневен број на случаи оваа година и е далеку под врвот од 150.000 пред околу еден месец.

Приближно 2,4 милиони случаи се регистрирани откако првиот случај на Омикрон беше откриен во Австралија во ноември. Дотогаш, Австралија броеше околу 200.000 случаи.

Околу 4.248 луѓе во Австралија починале од вирусот од почетокот на пандемијата. (Според агенциите)