„Туркиш ерлајнс“ планира да купи дури 600 авиони

„Туркиш ерлајнс“ ќе нарача вкупно 600 нови авиони во јуни, кои ќе бидат испорачани во рок од десет години, изјави во четвртокот претседателот на компанијата Ахмет Болат.

Болат рече дека нарачката ќе се состои од 400 авиони со тесно тело и 200 авиони со широко тело, а флотата ќе се зголеми на 810 авиони до 2033 година.

„При крај сме на разговорите со еден од големите производители. Ќе нарачаме околу 600 авиони“, изјави Болат на новинарите на прес-конференцијата по повод промовирањето на обновениот концепт на храна за време на летот.

Самитот на Меѓународната асоцијација за воздушен транспорт ќе се одржи во Истанбул од 4 до 6 јуни.

Болат, исто така, рече дека се многу блиску до договор со „Боинг“ за дел од нарачката, но не даде дополнителни детали.

„Туркиш ерлајнс“ може да ги нарача останатите нови авиони „од друг производител“ на саемот за воздухопловство во Фарнборо, исто така во јуни, додаде Болат.

Осврнувајќи се на изборите во Турција, тој рече дека очекува највисокото раководство на компанијата да продолжи да работи по гласањето за да може „Туркиш ерлајнс“ да го спроведе својот десетгодишен план за раст.