Турците се олабавија и веднаш скокна бројот на заразените

Турскиот министер за здравство, Фахретин Коџа, во саботата ги повика граѓаните да ги следат мерките за спречување на ширењето на Ковид-19, бидејќи земјата го регистрираше својот втор последователен ден на значителен скок на случаите.

Турција забележа 14 нови смртни случаи поврзани со корона вирусот и 1.459 нови случаи, што е втор ден да има 200 повеќе од претходниот.

„Порастот на бројот на случаи ги предупредува оние што не ги следат мерките. И големо предупредување за сите нас“, напиша Коџа на Твитер.

Вкупно 985 лица се опоравиле од Ковид-19 од петокот вечер, а 684 остануваат на интензивна нега, јави Министерството.

Со најновите бројки, смртните случаи на Ковид-19 во Турција достигнаа 4.792. Вкупниот број инфицирани од почетокот на кризата се 176.677 лица и Турција е на единаесеттото место во светот по заразени.

Претходно овој месец, Турција го укина полицискиот час за викендите и ограничувањата на меѓуградските патувања, повторно отвори кафулиња, ресторани, паркови и плажи, и продолжи со некои меѓународни летови, откако бројот на дневни смртни случаи во земјата зазеде надолна траекторија во последните недели.

Главното медицинско здружение на Турција во петокот ја критикуваше одлуката за олеснување на ограничувањата, велејќи дека потезите пристигнале прерано и не биле поддржани од науката.

„Се зборува кога ќе се удри вториот бран, но сè уште не сме успеале да го надминеме првиот бран“, велат од Турското медицинско здружение.

Неодамнешното покачување на бројот на случаи на Ковид-19 треба да се толкува како повик за будење за оние што ја отфрлаат заканата од вирусот, рече Научниот советодавен одбор за корона вирус.

„Ова е повик за будење. Немојте да претпоставувате дека ништо нема да ви се случи. Сè што се случува со другите може да ви се случи и вам. Никој од нас не е безбеден“, рече професорот Тевфик Озли на Твитер.

Озли рече дека никој во Турција не смее да не внимава и да се однесува слободно како што правеше пред пандемијата.

„Сите ние ја плаќаме цената за одбивањето на некои да се придржуваат до мерките“, напиша Озли. (Ахвал)