Турција затрупана и блокирана од голем снег (галерија)

Турција последните три дена е затрупана и блокирана од снег. Утрово и попладнево двата лета од Скопје за Истанбул беа откажани, покрај многу други што ги расипа плановите на илјадници патници. Телефоните на „Туркиш ерлајнс“ во Скопје денес беа „мртви“ и никој не се јавуваше да даде информација кога ќе стане оперативен летот од Скопје  за Истанбул, па информации можеа да се добијат само од веб страницата на компанијата – откако летовите се откажуваа. Не се знае каква ќе биде состојбата и утре иако на секои два саати од компанијата најавуваат обновување на летовите на аеродромот во Истанбул, кој еден период беше сосема затворен за сообраќај.  

Повеќето агенции денес јавија дека западните и северните региони на Турција продолжуваат да се борат со густите снежни врнежи во текот на викендот  кои го  нарушија меѓуградското патување.Двата автопати кои го поврзуваат Истанбул со главниот град Анкара беа повторно отворени во понеделникот, по неколкучасовно затворање поради обилните снежни врнежи и снежните виулици. Напорите за расчистување на снегот овозможија обновување на сообраќајот на автопатот Д-100 рано во понеделник.

Во неделата, властите ги повикаа патниците да ги избегнуваат автопатите, додека заглавените патници и возачи беа однесени во студентски домови, куќи за гости и други места во близина на автопатите, а возилата беа влечени во безбедни области. Лошото време особено влијае на дел од автопатот на планината Болу. Стотици возила беа заробени покрај патот со часови, создавајќи колини возила кои се протегаа на километри. Претходно оваа недела, 2.000 луѓе беа блокирани на главниот автопат на југот. Гувернерот на Болу, Ахмет Умит, изјави за медиумите доцна во неделата дека тоа се најобилните снежни врнежи од 1950-тите во регионот.

„Туркиш ерлајнс“ денеска најави откажување на 36 редовни летови до и од аеродромот во Истанбул и 31 редовен лет до и од меѓународниот аеродром „Сабиха Ѓокчен“ во Истанбул поради лошите временски услови.

На друго место, екипите работеа деноноќно за да ги исчистат патиштата од снег, но од понеделник попладне, неколку беа сè уште затворени, според патната управа на земјата. Во понеделникот повторно беше отворен и автопатот што ја поврзува медитеранската провинција Анталија со централна Коња, кој беше затворен на 22 јануари. Патот повремено беше отворен за сообраќај, но лавината минатата недела принуди целосно затворање.

Министерот за транспорт и инфраструктура Адил Караисмаилоглу ја увери јавноста дека повеќето патишта сѐ уште се отворени за сообраќај. Караисмаилоглу рече дека прогнозата предвидува уште лоши временски услови за следните неколку дена, предупредувајќи ја јавноста да биде подготвена.

Обилните снежни врнежи се префрлија на запад од внатрешните, јужните и источните делови на Анадолија во текот на викендот, со сообраќаен хаос што ги зафати големите градови. Во Истанбул три лица загинаа во автобуска несреќа во неделата поради обилни снежни врнежи, додека други 18 се повредени кога автобус влетал во канал, откако возачот изгубил контрола над возилото поради снег и мраз на патот. Преминот низ Босфорот беше привремено затворен бидејќи снежните виулици и врнежите ја намалија видливоста. Обилните снежни врнежи во југоисточните региони доведоа до затворање на патиштата кон селата и оддалечените локации.

Во Истанбул снежните врнежи се очекува да продолжат и до средината на неделата. Управата на градот објави дека е-скутерите се забранети за сообраќај во понеделник, додека куририте со мотоцикли, кои играат клучна улога во испораката на храна и основните предмети за време на лошите временски услови, исто така добија забрана за сообраќај во понеделник. Два дена се затворени и универзитетите. Инвалиди и бремени државни службеници беа ставени на административно отсуство во градот. Сепак, рано во понеделникот немаше поголем прекин на сообраќајот во метрополата.