Тур де Франс: 1-2 победа на Словенците на Пиринеите, Погачар ја освои етапата, Роглич во жолтата маичка
Примож Роглич (Јумбо-Висма) ја презеде жолтата маичка како лидер на трката во Ларун, откако уште еден агресивен ден на Пиринеите го растресе вкупниот пласман на Тур де Франс во 2020 година.
Етапата ја освои Тадеј Погачар (Емирати), победувајќи ги Роглич и Марк Хирши (Санвеб) во спринт, а во истото време завршија Еган Бернал (Инеос Гренадиер) и Микел Ланда (Бахреин Мекларен).
Хирши храбро нападна сам рано на Кол де ла Хурсер, на 80 км од целта, но беше сурово фатен на само 1,6 км од целта. Тој ја зачува силата за спринт, но беше поминат од Погачар и Роглич во последните метри.
Лидерите го дистанцираа досегашниот лидер Адам Јејтс во близина на врвот Мари Бланк, кога Погачар нападна на двоцифрените градиенти и само Бернал, Роглич и Ланда можеа да одат со него. Јејтс беше фатен од групата на чело со тимот на Мовистар при спуштањето и заврши со заостанување од 54 секунди, паѓајќи на осмото место во генералниот пласман.
Додека возачите патуваат на францускиот брег за првиот ден одмор во понеделник, Роглич води пред Бернал со 21 секунда, трет е Гијом Мартин (Кофидис) на 28 секунди, Погачар се искачи на седмото место благодарение на десет секунди временски бонус за освојувачот на етапата и сега е на 44 секунди и е сериозен кандидат за врвот во генералниот пласман. Погачар ги стави рацете на главата по победата на етапата, шокиран и пресреќен што ја освои својата прва етапа на Тур де Франс со само 21 година.
„Навистина е лудо – по тој тежок ден да се победи на етапа. Навистина е неверојатно. Им благодарам на моите колеги од тимот, тие завршија навистина добра работа целиот ден. Навистина сум среќен што ја извлеков таа победа. Сакав да освојам колку што е можно повеќе време во генералниот пласман, но во последните 800 метри знаев дека етапната победа вреди 10 секунди. Се фокусирав на спринтот и само притиснав полн гас“, рече Погачар по трката.
Погачар е вториот словенечки возач што победил во Ларун по победата на Роглич во 2018 година. Двајцата се ривали, но се чини дека склучија договор за соработка и покрај тоа што речиси паднаа кога им се допреа тркала на врвот Мари Бланк.
„Примож е навистина добар – тој победи претходно, тој уште ќе победува. Се надевам дека можеме да направиме големи работи заедно“, рече Погачар. „Јас сум навистина среќен во целина досега. Секако, имавме мала грешка во една етапа, но освоивме две етапи, така што досега е навистина добро“.
Роглич за прв пат во својата кариера ја облече жолтата маичка на лидерот Тур де Франс, ја задржа својата мирнотија.
„Прекрасно е – прв пат ја имам“, рече Роглич за чистот жолт дрес на рамениците.
„Секој сонува за тоа, кога ќе започнете да бидете возач, да го носите. Значи, јас сум супер среќен, исто така и за момците, бидејќи тие завршија неверојатна работа. Тоа е исто така за нив. Мислев дека и денес ќе победам, но ја симнувам капата за Тадеј. Нешто секогаш може да биде подобро, но не го добивате жолтиот дрес секој ден“, рече Роглич.
Одбраната на Роглич на жолтата маичка и втората недела на Тур де Франс започнува во вторник со рамна етапа на изложените патишта на ветрови крај мочуриштата Ла Рошел. Следат етапи низ централна Франција до Поатје и планинска завршница во Централниот масив на Пуј Мери пред етапата до Лион, а потоа последната недела на Алпите и претпоследната етапа што се вози на хронометар. (Сајклинг њуз)