Три леви партии во Берлин се договорија за експропријација на 160.000 станови

Идната влада на германската покраина Берлин би можела да префрли околу 160.000 станови во јавна сопственост, според прелиминарниот коалициски договор постигнат меѓу партијата Левица, Зелените и Социјалдемократската партија (СПД), пренесе агенцијата ДПА. Документот бара одобрување од сите три партии пред во ноември да започнат официјалните преговори за формирање влада.

Планот предвидува експропријација на дел од станбениот фонд што е во сопственост на компании кои поседуваат повеќе од 10.000 станови во германскиот главен град. Станбените единици што го надминуваат овој праг би преминале во јавна сопственост.

Елиф Ералп, која се стреми да стане првиот градоначалник на Берлин од редовите на Левица, изјави дека договорената мерка ќе опфати пет компании, меѓу кои и „Воновија“.

Достапноста на становите беше клучно прашање на изборите одржани пред еден месец, на кои Левица оствари победа. Кириите во Берлин значително пораснаа во последните години, додека понудата на јавни станови останува недоволна. На референдумот во 2021 година, мнозинството гласачи поддржаа ставање на големите станбени компании под јавна контрола, иако оваа одлука сè уште не е спроведена.

Прелиминарниот договор исто така вклучува одредба за ограничување на зголемувањето на кириите за околу 440.000 станови во јавна сопственост, на најмногу 2 отсто годишно.

Трите партии планираат да преземат построги мерки против незаконското зголемување на кириите. Планот, исто така, предвидува издавање на 100.000 градежни дозволи до 2031 година, со цел изградба на исто толку нови, достапни станбени единици.

Овој договор доаѓа по тензични дискусии, обележани со спор околу борбата против антисемитизмот. Зелените и социјалдемократите поставија постигнување договор за ова прашање како предуслов за започнување на прелиминарните коалициски разговори. Тензиите произлегоа од критиките упатени кон ставот на одредени фракции во берлинскиот огранок на Левица кон Израел, како и од обвинувањата дека партијата не прави доволно во борбата против антисемитизмот.

„Заеднички се обврзуваме да го заштитиме еврејскиот живот“, изјави Ералп. „Ќе преземеме мерки против антисемитизмот“, додаде таа. Меѓу другите предлози е и воведувањето на еден ден во годината за бесплатно собирање на кабаст отпад, пренесе ДПА.

Зелените планираат да го разгледаат прелиминарниот договор на партиска конференција утре. Регионалното раководство на СПД исто така треба да се изјасни, иако датумот сè уште не е одреден. Левица ќе донесе одлука на конференција на 31 октомври.

Доколку сите три партии дадат согласност, официјалните коалициски преговори би можеле да започнат на почетокот на ноември.