Трговија со секс во богатите американски кругови: Милијардерот Епштајн искористувал малолетнички

САД – Американскиот финансиер Џефри Епштајн во понеделникот се изјасни дека не е виновен за обвиненија за трговија со секс, откако обвинителите го осомничија дека намамил десетици девојки на возраст од 14 години во неговите луксузни домови во Њујорк и Флорида и ги плаќал за сексуални активности.

Обвинението што беше претставено федералниот суд во Менхетен го товари 66-годишниот Епштајн за организирање девојки за да изведуваат „масажи“ и други сексуални активности, како и плаќање на некои девојки за регрутирање други.

„Наводното однесување ја шокира совеста, а иако осомниченото однесување е од пред повеќе години, тоа е сè уште длабоко важно за многу наводни жртви, сега млади жени“, изјави обвинителот Џефри Берман на прес-конференција. „Тие го заслужуваат нивниот ден во судот“, додаде тој.

Епштајн беше познат по дружењето со политичарите и кралски семејства, со пријателите меѓу кои претседателот Доналд Трамп, поранешниот претседател Бил Клинтон и според судските документи, британскиот принц Ендрју. Ниту еден од тие луѓе не беше споменат во обвинението.

Носејќи темносина затворска облека, Епштајн поднесе молба пред судијата Хенри Питман за една точка за трговијата со секс и за една точка за заговор со трговија со сексуални услуги. Епштајн се соочува со 45 години затвор ако биде осуден.

Според обвинението, поранешниот менаџер на хеџ-фонд „намерно барал малолетнички и знаел дека многу од неговите жртви всушност биле под 18 години, меѓу другото затоа што, во некои случаи, малолетните жртви експлицитно му ја кажале нивната возраст“.

Епштајн, кој е регистриран како сексуален престапник во 2008 година во Флорида, изјави во претходните судски поднесоци дека неговите средби со наводни жртви биле консензуални и дека тој верувал дека тие имале 18 години кога се случиле. Епштајн ќе остане во затвор најмалку до 15 јули, кога судијата закажа рочиште за кауција.

Обвинителите рекоа дека на Епштајн треба да му биде одбиена кауцијата, тврдејќи дека има „голем ризик да избега“ поради неговото богатство, приватни авиони и значајни меѓународни врски.

Епштајн беше уапсен во саботата вечерта на аеродромот „Тетерборо“ во Њу Џерси, каде што се вратил со својот приватен авион од Париз.

Обвинителите рекоа дека претресот на куќата на Епштајн во Менхетен откри стотици, а веројатно илјадници фотографии на „она што се чини дека се малолетни девојки“.

Берман ги охрабри другите жртви да излезат и да контактираат со обвинителите. Тој одби да ги коментира шпекулациите во медиумите за луѓето поврзани со Епштајн, велејќи им на новинарите: „Ве повикувам да не го читате тоа на овој или на оној начин“.

Во 2002 година, тогашниот бизнисмен Трамп го пофали Епштајн во интервју за магазинот „Њујорк“. „Јас се знам со Џеф петнаесет години. Страшен човек“, рече Трамп. „Многу е забавно да се биде со него. Дури ми рекле дека му се допаѓа убава жена колку што мене ми се допаѓа, а многу од нив се помлади. Нема сомнение за тоа – Џефри го ужива својот социјален живот“, додаде тој.

Портпаролот на Клинтон соопшти во изјава: „Претседателот Клинтон не знае ништо за ужасните злосторства за кои Џефри Епштајн се изјасни виновен во Флорида пред неколку години, или оние со кои тој неодамна беше обвинет во Њујорк… Тој не зборува со Епштајн повеќе од една деценија“.

Епштајн првпат беше под истрага во 2005 година, откако полицијата во Палм Бич, Флорида, доби извештаи дека тој сексуално злоупотребувал малолетни девојки во неговата палата таму.

До 2007 година Епштајн се соочи со потенцијално федерално обвинение за сексуално малтретирање на десетици девојки помеѓу 1999 и 2007 година. Сепак, Епштајн постигна договор и се изјасни за виновен во 2008 година за помала казна во Флорида и да се регистрира како сексуален престапник.

Тој отслужи 13 месеци во окружниот затвор, но му било дозволено во текот на денот да оди во својата канцеларија. Некои од оние што го обвинија Епштајн го критикуваа тој договор како премногу благ.

Обвинителите што помогнаа во изработката на договорот од Флорида го вклучуваат тогашниот окружен обвинител Алекс Акоста, кој сега е министер за труд на Трамп.

Според обвинението, Епштајн најпрво ги регрутирал жртвите за да обезбеди „масажи“, кои тие би ги извршиле голи или делумно голи.

Обвинителите изјавија дека допирите станувале сè посексуални, понекогаш вклучувајќи и индиректен контакт со гениталиите на жртвите, при што Епштајн обично мастурбирал и барал од жртвите да го допираат додека го правел тоа.

Епштајн им плаќал на девојки да регрутираат нови девојки, за да обезбедат „стабилно снабдување со нови жртви за искористување“, изјавија обвинителите.

Тројца неименувани вработени, еден во Менхетен и двајца во Флорида, му помогнале на Епштајн да организира некои од неговите сексуални контакти, се вели во обвинението. (Ројтерс)