Трамп за корона вирусот: „Луѓето умираат… тоа е тоа“

Претседателот Доналд Трамп во интервју рече дека корона вирусот во САД е под контрола и дека зголемувањето на бројот на починати „е тоа што е“ откако случаите пораснаа во некои држави.

Во интервјуто за дигиталниот весник „Аксиос“ минатата недела, што се емитуваше во целост во понеделникот на ХБО, Трамп беше запрашан како вирусот е под контрола кога 1.000 Американци умираат секој ден.

„Тие умираат, тоа е вистина. И вие имате – тоа е тоа. Но, тоа не значи дека не правиме сè што можеме. Тоа е под контрола колку што можете да го контролирате. Ова е ужасна чума“,рече Трамп.

На прашањето како смета дека 1.000 смртни случаи на ден е онолку колку што САД можат да ја контролираат епидемијата, претседателот рече: „Прво, ние направивме одлична работа. Гувернерите добија сè што им беше потребно. Еден ден ќе седнеме, ќе разговараме за успешните, за добрите работи… Имавме добри и лоши. И имавме многу во средина“, додаде тој.

Говорејќи пред новинарите во салата за брифинг во Белата куќа во понеделникот, Трамп изјави дека „вирусот опаѓа“ и рече дека виделе „бавни подобрувања“ во жариштата низ Југот и Западот, издвојувајќи ги Аризона, Тексас и Флорида.

Претседателот рече дека случаите се зголемени во Џорџија, Мисисипи, Тенеси, Оклахома и Мисури, но додаде: „Мислам дека ќе откриете дека наскоро ќе бидат многу под контрола“.

Од вторникот, повеќе од 4,7 милиони луѓе биле позитивни на Ковид-19 во САД, а повеќе од 156.500 луѓе починаа.