Трамп вели дека победникот на изборите можеби нема да се знае со месеци

Доналд Трамп и Мајк Пенс пристигнуваат на митингот во Њупорт Њуз во Вирџинија (Фото: Ројтерс)

 

Претседателот на САД, Доналд Трамп, во петокот рече дека Американците можеби нема да го дознаат победникот на претседателските избори во ноември со месеци, поради расправии околу гласачките ливчиња, врз основа на неговите критики за методот што може да го користат половина од американските гласачи оваа година.

Изборните експерти изјавија дека може да потрае неколку дена по изборите на 3 ноември додека не се знае победникот, бидејќи на официјалните лица ќе им треба време да ги пребројат гласачките ливчиња што ќе пристигнат по денот на изборите.

Говорејќи на митинг во Њупорт Њуз, Вирџинија, Трамп рече дека повеќе би сакал брзо да открие дали победил или изгубил, отколку да чека да влезат ливчињата по пошта.

„Ми се допаѓа да гледам телевизија и да чујам ‘Победникот е’, нели? Можеби нема да го чуете со месеци, бидејќи ова е хаос “, рече тој.

„Многу е малку веројатно дека ќе го слушнете победникот таа вечер“, рече тој. „Јас би можел да водам, а потоа тие ќе продолжат да добиваат ливчиња, ливчиња и ливчиња. Затоа што сега тие велат дека гласачките ливчиња можат да дојдат доцна“.

Судските пресуди овој месец им дозволија на официјалните лица во клучните држави Мичиген, Пенсилванија, Висконсин и Северна Каролина да пребројуваат гласачки ливчиња што пристигнуваат по 3 ноември, сè додека тие се испратени до денот на изборите.

Анкетите за јавното мислење покажуваат дека повеќе демократи отколку републиканци планираат да гласаат по пошта за да избегнат изложеност на Ковид-19 во преполните избирачки места. Кампањата на Трамп покрена тужби во неколку држави за ограничување на гласањето по пошта.

Трамп последните денови одби да каже дека ќе има мирен трансфер на власта доколку ги загуби изборите од демократот Џо Бајден и рече дека очекува оти Врховниот суд ќе мора да прогласи победник. (Ројтерс)