Трамп сака Нетанјаху да биде сменет, министерот за одбрана бил „кретен“

Поранешниот американски претседател Доналд Трамп приватно барал премиерот Бенјамин Нетанјаху да биде „отповикан“ затоа што не го предвидел масовниот напад на Хамас, се вели во извештајот од четвртокот.

Ставот е изнесен во разговорите што Трамп ги имал со неколку произраелски, републикански сојузници кои го прашале поранешниот претседател и актуелен претседателски фаворит од Републиканската партија како би се справил со сегашната војна Израел-Хамас, објави магазинот „Ролингстоун“, цитирајќи два извори запознаени со предметот.

Трамп предложи фаќање и екстрадиција на личности на Хамас заедно со прекинување на сета американска хуманитарна помош за Палестинците (и на Западниот Брег и на Газа, како што правеше кога беше претседател), објави „Ролингстоун“.

Трамп никогаш не му прости на Нетанјаху што му честиташе на американскиот претседател Џо Бајден по победата на изборите во 2020 година. Трамп ја изразил својата желба Нетанјаху да биде надвор од функцијата додека се надева дека ќе се врати во Белата куќа како претседател во 2025 година, според извештајот.

Исто така, во овие разговори со произраелските, републикански сојузници, Трамп го спореди „многу слабиот“ Нетанјаху со мнозинството американски Евреи кои гласаа за Бајден на претходните избори.

Извештајот на „Ролингстоун“ дојде кога Трамп веќе беше на удар од Израел, Бајден, па дури и од републиканските ривали поради коментарите што ги даде на предизборниот митинг во средата, критикувајќи го Ерусалим поради неуспехот на разузнавањето што доведе до нападот на Хамас, нарекувајќи го министерот за одбрана Јоав Галант „кретен“, а терористичката група Хезболах „многу паметна“.

Трамп ги даде коментарите потсетувајќи на атентатот на неговата администрација во 2020 година на Касем Сулејмани, шеф на елитните сили Кудс на иранската Револуционерна гарда.

Трамп го повтори своето тврдење дека Нетанјаху се откажал во последен момент од активното учество во убиството.

„Никогаш нема да заборавам дека Биби Нетанјаху нѐ изневери. Тоа беше многу страшна работа. Бевме многу разочарани, но самите ја завршивме работата и тоа беше апсолутна прецизност, прекрасна, убава работа“, рече тој. „Потоа Биби се обиде да ја преземе заслугата за тоа. Тоа не ме направи да се чувствувам премногу добро“.

Канцеларијата на Нетанјаху не одговори веднаш на барањето за коментар. Но, министерот за комуникации, Шломо Кархи, за израелскиот Канал 13 изјави дека е „срамно што таков човек, поранешен претседател на САД, поттикнува пропаганда и шири работи што го повредуваат духот на израелските борци и неговите граѓани“.

Во очигледен обид за контрола на штетите откако неговите забелешки привлекоа големо внимание во Израел и САД, кампањата на Трамп издаде изјава во која се изјавува: „Немаше подобар пријател или сојузник на Израел од претседателот Доналд Трамп“.

Претходно во четвртокот, Бајден го критикуваше Трамп поради коментарите. „Поддршката на нашата нација за Израел е одлучна и непоколеблива“, гласи твитот од профилот на Бајден, кој се поврзува со клип од предизборниот митинг на Трамп. „Никогаш не е вистинско време да се пофалат терористите“.

Гувернерот на Флорида, Рон Десантис, кој е на далечно второ место зад Трамп во трката за републиканска претседателска номинација во 2024 година, исто така го осуди својот ривал.

„Апсурдно е некој, а уште помалку некој што се кандидира за претседател, да избере сега да го нападне нашиот пријател и сојузник, Израел, а уште помалку да ги пофали терористите на Хезболах како ‘многу паметни’“, објави тој на X. (Според агенциите)