Трамп: Многу е важно папата Лав XIV да разбере дека Иран претставува закана за светот

Претседателот на Соединетите Американски Држави, Доналд Трамп, синоќа изјави дека е „многу важно“ папата Лав XIV да разбере дека Иран претставува закана за светот.

„Папата може да каже што сака и јас сакам тој да каже што сака, но можеби не се согласувам“, изјави Трамп пред новинарите пред Белата куќа.

Како што нагласи, папата Лав XIV мора да разбере дека ова е реалниот свет.

Претходно вчера, за време на посетата на Камерун, папата Лав XIV остро ги критикуваше лидерите кои трошат милијарди за војни и нагласи дека светот е „уништен од неколку тирани“.

Првиот папа од Соединетите Американски Држави, исто така, ги осуди лидерите кои користат религиозен јазик за да ги оправдаат војните и повика на „решителна промена на курсот“ за време на состанокот во најголемиот град во Камерун, Дуала.

Трамп претходно ги критикуваше ставовите на папата за војната, велејќи на социјалните мрежи дека првиот папа роден во Америка бил „слаб во однос на криминалот“ и „лош во надворешната политика“.

Папата Лав XIV, сепак, го задржа својот антивоен став, велејќи дека „нема страв од администрацијата на Доналд Трамп“ и дека „Божјото срце е растргнато од војни, насилство, неправда и лаги“.