Трамп испраќа федерални сили во градовите раководени од демократите

ВАШИНГТОН – Претседателот Доналд Трамп во понеделникот изјави дека ќе испрати сили за спроведување на законот во повеќе американски градови, додека федералната акција против антирасистичките протести во Орегон со необележани автомобили и неидентификувани сили ги разгневи луѓето низ целата земја.

Трамп, републиканец, ги наведе Њујорк, Чикаго, Филаделфија, Детроит, Балтимор и Оукланд како места за испраќање на федерални агенти, истакнувајќи дека градоначалниците на градовите биле „либерални демократи“. Градоначалничката на Чикаго, Лори Лајтфоут, често го осудува Трамп на Твитер.

„Ние испраќаме сили за спроведување на законот“, им рече Трамп пред новинарите во Белата куќа. „Не можеме да дозволиме ова да се случува во градовите“.

Државните и локалните лидери во Орегон, како и членовите на Конгрес, го повикаа Трамп да ги отстрани тајните полициски сили на Министерството за внатрешни работи од Портланд, Орегон, откако на видеата се гледаше како неидентификуван федерален персонал собира луѓе и ги става во црни минибуси.

„Не само што верувам дека тој го крши законот, туку тој ги загрозува и животите на граѓаните на Портланд“, твитна градоначалникот на градот, Тед Вилер, нарекувајќи го претходно федералното присуство „политички театар“ во изборната година.

Трамп, заостанувајќи во анкетите на јавното мислење зад Џо Бајден, во јуни се прогласи за „претседател на законот и редот“ и се закани дека ќе ги испрати американските војници во градовите по понекогаш насилните протести и грабежи по смртта на Афроамериканецот Џорџ Флојд.

Минатата недела федералните агенти започнаа со кршење на протестите во Портланд против полициската бруталност и системскиот расизам, користејќи солзавец за одбрана на федералните згради и одведување на некои активисти во притвор, без објаснување.

И покрај националното негодување за тактиките, претставници на Министерството за внатрешни работи во понеделникот рекоа дека нема да се повлечат и нема да се извинат.

Државата Орегон и американската унија за граѓански слободи ја тужеа администрацијата на Трамп за нелегално приведување на жителите на Орегон, а некои републиканци излегоа против неговата тактика во понеделникот.

„Нема место за федерални трупи или неидентификувани федерални агенти кои ги одведуваат луѓето“, твитна американскиот сенатор Ренд Пол од Кентаки.  (Ројтерс)